Pagmugna’g korente gikan sa

basura, giaghat sa Ordinansa

TAGBILARAN CITY, Bohol, Oct 30 (PIA)—Giaghat sa bag-o nga napalusot nga ordinansa sa Bohol ang pagduso sa mga proyekto nga magtuki sa paghimo og enerhiya gikan sa mga basura.

Sa napasar sa Sangguniang panlalawigan nga Provincial Ordinance No 2023-018, o ang Clean and Renewable Energy Code of Bohol, giaghat niini ngadto ni bisan kinsa nga mamumuhunan, sa pagtuki sa paghimo og limpyo nga koryente gikan sa basura.

Kini dili lamang maghatag sa Bohol sa dugang kapilian alang sa mas limpyo ug sustenable nga tiunubdan sa koryente, kini usab magatabang sa pagtubag sa suliran sa pagdumala ug pagtipig sa basura, gikan sa mga kabalayan ug mga establisemento.

Kahinumduman nga ang Bohol una na nga nagpasupot sa Bohol Environment Code, nag nagpadayag sa kabubot-on sa mga Bol-anon nga mopili sa mas limpyo, mas barato ug mas kasaligan nga tinubdan sa koryente, alang sa malungtaron nga laugmaran sa lalawigan.

Apan, bisan pa niini, pipila pa lamang ka kalungsuran ang may kasaligan nga sistema sa pagtipig ug paghipos sa basura, ug kadaghanan niini, nabiyaan nga nagpasad o wala mamaayo og tipig nga maoy hinungdan sa mas daghan pang suliran, lakip na ang sakit, pagkamatay sa mga buhilaman nga nahilo ug natuok sa basura u gang pagkahugaw sa hangin dala sa pagsunog sa dili madugta nga plastic.

Samtang halos mapuno na ang aprobado nga mga sanitary landfills nga gisawhan sa mga kalungsuran isip labuganan sa basura, ang paghimo sa koryente gikan niini, us aka maayong paagi pagdumala sa sagbot, dayag ni Atty ug board member Jisella Rae Villamor, ang author ug sponsor sa ordinansa.

Segun gihapons a ordinansa, kadtong mamuhunan niining matag sa pagkuha sa koryente gikans a basura, mahimong mahatagan sa insentibo sama sa dili pagbayad sa buhi sa ilang proyedad real sulod sa lima ka tuig.

Ang tax holiday hinuon, makuha lamang kon ang proyekyo operational na ug mahatagan na og certificate of registration sa Bohol Investment Board. (RAHC/PIA_7/Bohol)

INCINERATION. Pinaagi sa pagsunog sa basura gamit ang teknolohiya sa incineration, ang init nga epekto niini, mamahimong iconvert ngadto sa limpyo nga korente samtang mahipos pa ang nagkatag nga mga basura. (PIABohol)