600+ employer pakyas paghatag

P200/buwan tugbang sa Pag-ibig

TAGBILARAN CITY, Bohol, March 5 (PIA)— Aduna pay kapin sa 600 ka mga employer dinhi ang wala makatuman sa paghatag sa napa-usbaw na nga employers share alang sa ilang mga sakop nga nagbayad nag P200 sa ilang binuwan nga hatagan sa Home Development Mutual Fund o Pag-ibig Fund.

Kini maoy gibutyag ni Pag-ibig Fund Bohol Branch Head Elenette Magdalera, didto sa Kapihan sa PIA nga gitagana alang sa pagpadayag sa mga programa sa Pag-ibig Fund.

Segun sa Pag-Ibig Find Circular 460, nga maoy basehanan sa pagpatuman sa pag-usbaw sa Maximum Fund Salary (MFS) sugod sa Pebrero 2024, ang MFS nga gamiton sa pagkalang-kalang sa matigum matag buwan sa emproyer ug empleyado, gipadak-an na gikan sa P5 mil ngadto na sa P10 mil subay usab sa Section 7 sa Republic Act No. 9679.

Nunot niini, gikan sa Pebrero 2024, P200 na ang binuwan nga hulog sa mga empleyado, samtang kini tugbangan usab sa susamang kantidad sa employer.

Apan, segun pa sa Pag-ibig Fund, dili pa tanan nga mga employer ang nagtuman sa mandu sa balaod.

Sa higayon nga ang employer pagkay sa pagpatuman sa Pag-IBIG MFS, wala sila magkaltas og sakto ug wala usab sila maghatag sa saktong tugbang niini aron maoy matigum sa empleyado matag buwan.

Buot usab ipasabut niini nga wala sila magremit sa gikinahanglang kontribusyon ngadto sa Pag-ibig fund, ug kini usa ka pagsupak sa balaod, pahinumdom sa Pag-ibig Fund.

Kini nagtaban na og mga silot ngadto sa employer, multa sama sa interes, ug mahimo pa sila nga makiha ug kahukman segun sa kadaku sa kakuwangon ug ilabi na kon mapamatud-an nga gituyo nga dili sundon ang balaod.

Niini, samtang wala pa makalanat og daku ang mga balayranan ug multa, giaghat sa Pa-ibig Fund ang mga employer nga natungdan sa paghusay sa ilang mga kal-ang aron malikayan ang kahasul ug hingpit na nga matabangan ang mga trabahante nga ilang gigamit sa pagpadagan sa ilang negosyo. (rahc/PIABohol)

KULANG ANG MATIGUM. Sa higayon nga dili kompleto ang iremit s amga empleyado, kuwang ang banuwan nga tigum sa mga sakop, ug mas malangan kini sa pagpadaku sa iyahang binuwan nga tampo nga iya ra unya nga mahuwaman kon may panginahanglan, pasabut ni Elenette Magdalera sa Pag-ibig Bohol. (PIABohol)