‘Mobile disinfection teams’

Batok ASF giumol sa Bohol

TAGBILARAN CITY, Bohol, March 6 (PIA)— Nag-umol na ang Bohol og mga mobile disinfection teams ug sa abag sa pribadong sector, maghipno kini sa mga stratehiya alang sa mas sayon, mas dali ug mas epektibo nga pamatay kagaw sa mga sakyanan nga kargahan og mga baboy sa mga mamalitay ug sa ilang mga canvassers.

Ang mga disinfection teams sa Bohol, tua ra mahimutang sa mga pantalan aron himoag disinfection ang mga sakyanan nga mosulod sa Bohol kay basin maoy giagi-an sa kagaw gikan sa mga lugar nga namatikdan ang African Swine Fever. (ASF)

Kini maoy unod sa Executive Order No 16 nga gipagawas ni Gobernador Erico Aristotle Aumentado niadtong Pebrero 24, 2025, subay pa gihapon sa pagpa-ugmad sa mga nalatd nga sumbanan sa pagpugong sa pagkatag sa ASF dinhi sa Bohol.

Matud pa ni Romulo Garcia, hepe sa operations sa Office of the Provincial Veterinarian (OPV), may maayo unta nga record ang Bohol sa pagcontain sa sakit nga mopuo sa mga baboy nga matakdan niini, apan, may gidudahang mga palusot nga nagpanghitabo sa wala pa ikapahimutang ang cordon aron wala nay makagawas.

Gawas pa niini, nagpadayon ang pamalitay sa mga baboy, diin nasinati ang pagbarato didto sa mga silingang dapit sa mga lugar nga namatikdan usab ang ASF, ug kining nga baboy nga nakompra, gikarga sa mga sakyanan nga wala na gani iagi og pamatay-kagaw.

Ug sanglit mamalitay sa baboy, natural lang usab nga ang mga sakyanan mosulod sa mga lugar nga mahimong maoy nakadala sa sakit, o nagpagawas sa sakit gikan sa mga apektadong lugar, katahap sa OPV.

Nunot na usab niini, gilatid sa bag-ong executive order sa gobernador nga aron makabaton sa hiniusa ug sinabutan nga pagdumala sa pagpatumod sa mga baboy ug karne, ang tanan nga pag-isyu sa Veterinary Health Certificates (VHC) alang sa baboy, usa na lang ug sentralisado ang sistema gikan sa Office of the Provincial Veterinarian.

Ang VHC usa ka dokumento nga kinahanglan nga huptan sa mga byahedor nga nagkarga og karne o buhi nga baboy, nga magmatuod nga kini nga karne o buhing baboy, walay sakit ug nakalabang sa testing sa ASF sa wala pa ikarga. (RAHC/PIA_7/Bohol)

SULOD GAWAS- Sa mga sakyanan nga kargahanan s amga kinomprang baboy nga bisan sa nagkadaiyang lugar, angay lamang kining sitahon sa mga barangay aron sutaon kon may ikapakita ba nga sertipiko nga sila naigi sa pag disinfect, kay sagad nga sila ra usab ang kina-ingnan sa pagkatag sa kagaw sulod sa Bohol. (PIABohol/PNA foto)