Mintinara kanunay ang fire

extinguisher pressure -BFP

TAGBILARAN CITY, Bohol, March 6 (PIA)— May expiration date man ang inyong napalit nga fire extinguisher, molahutay kini kon permi nga tandugon ang chemical fire retardant niini, kini maoy tambag sa Bureau of Fire Protection (BFP) alang sa buwan sa pagpugong sa sunog.

Didto sa Kapihan sa PIA, gibutyag ni Fire Superintedent Raul Bustaliño, ang Bohol Fire Marshal, nga ang fire extinguisher nga dili matandog ang kemikal, mahimo kining molugdang ug mobantok, mao nga mawala ang pressure, ug dili na hinuon magamit.

Sa matag karon ug unya, inspeksyonon bisan kausa sa us aka buwan ang fire extinguisher ug kinahanglang uy-ogon aron moactivate sa kemikal ug magpabilin nga aktibo ug dili makalugdang, tambag sa BFP.

Kalingawan usab og bantay ang pressure nga Makita sa pressure gauge sa extinguisher, aron masayran kon magamit pa ba o dili na ang gitinir nga pamatay-sunog.

Ang labing pait nga nagsalig ang tawo nga may fire extinguisher, apan diay, sa higayon nga kinahanglan na nga gamiton, wala nay pressure ug dakun na hinuon ang kadaut.

Nunot usab niini, dili tanang matang sa sunog, magamitan sa usa lamang ka matang sa fire extinguisher, samtud pa sa mga websites sa kabomberohan.

Ang fire extinguishers, dunay nagkalain-lain nga klase, alang usab sa nagkalahi nga matang sa sunog.

Ang Class A nga fire extinguisher alang sa mga ordinary nga masunog: kahoy, papel, noog, basura, guma, ubang matang sa plastic.

Ang Class B nga fire extinguisher gidesinyo usab alang sa masunog nga mga liquids, sama sa lana, grasa, pintura, gasoline, mga kerosene based nga solvents, alcohol, ether ug uban pa.

Ang Class C nga fire extinguisher alang sa pagpatay sa kalayo nga gikan sa koryente: sunog sa plangka, motor nga de korente, wiring, appliances, ug gamit nga electrical.

Class D ang epektibo alang sa mga kayo nga gidangop sa mga metal nga masunog sama sa magnesium, aluminum, titanium, soldium, lithium ug uban pa samtang ang Class K nga fire extinguisher, magamit sa mga mantika, empelya ug vegetable oils.

Hinuon, kasagaran nga fire extinguisher nga gipalit, kadtong Class A-B-C.

Gipahinumdom usab sa BFP ang upat na mga lakang angay hinumduman sa paggamit sa extinguishers: ibta ang pin, itutok ang nozzle sa diin nagagikan ang kayo, pisliton ang lever aron mogawas ang kemikal, dayon iwisiwisi ang nozzle aron mapawong ang kayo.

Usa pa, ang fire extinguisher, magamit lamang sa mga ginagmay nga sunog, ug dili maghimpos kon nakadilaab nag dako. (RAHC/PIA_7/Bohol)

MATAG TUIG. Itugyan sa fire safety inspection ang inyong fire extinguisher sa taga BFP matag tuig, aron masayran kon kini magamit pa ba o dili na. Labing pait kanang naglaum nga may fire extinguisher apan sa paggamit na, wala na diay pressure, ug kawang lamang, tambag sa BFP didto sa Kapihan sa PIA. (PIABohol)