ATI-7 may tanyag nga libreng

online agriculture, fisheries course

TAGBILARAN CITY, Bohol (PIA)--Ang Agricultural Training Institute (ATI) nagtanyag og libre nga mga kurso sa agrikultura ug sa pangisda pinaagi sa ilang e-Learning course program.

Si Shanemie Carelle Daquio Pradera, Information Officer sa ATI Regional Training Center VII, nag-awhag sa mga interesadong indibidwal nga mo-enrol sa ilang online courses diin adunay dul-an sa 30 ka mga kurso nga mahimong kapilian sa mga enrollees.

Matud pa nga tulo niini ang gihimo sa ATI-7 nga mao ang Ube production, Urban gardening ug Mokusaku (Wood Vinegar).

Si Pradera nagkanayon nga ang mga kurso nga ilang gitanyag naglakip sa nagkalain-laing production technologies sama sa pagpananom, pagpamuhi og hayop, manokan, pangisdaan, organic farming, community organizing ug uban pang mga kurso nga may kalabotan sa agrikultura.

Gidugang pa ni Pradera nga ang nakamaayo niining maong programa kay mahimo ra kining kuhaon ug tiwason ang kurso depende ra sa oras sa enrollees tungod kay online man kini gamit lamang ang cellphone o laptop.

Ang mga malampuson nga tinun-an sa e-learning makadawat og Certificate of Completion.

Alang sa mga interesado nga mokuha sa mga kurso, moparehistro lamang sila sa e-learning website sa ATI pinaagi sa pag-create og account.

Gipasalig ni Pradera nga ang mga kurso nga ilang gitanyag tukma ug up-to-date kini tungod kay gigama kini sa ATI uban sa mga subject matter specialists gikan sa research and development institutions, mga ahensya sa gobyerno sama sa Philippine Rice Research Institute (PhilRice), Philippine Center for Postharvest Development and Mechanization (PhilMech), state universities and colleges ingon man sa pribadong sektor. (ecb/PIA7-Bohol)