DSWD mi-awhag sa mga solo nga inahan, amahan

sa pag-aplay, pag-update sa ilang solo parent ID

TAGBILARAN CITY, Bohol (PIA)--Samtang ang nasud nag-obserbar sa National Women’s Month nga adunay tema nga “Babae sa Lahat ng Sektor, Aangat ang Bukas sa Bagong Pilipinas,” ang Department of Social Welfare and Development (DSWD) nag-awhag sa tanang solo nga ginikanan sa pag-aplay o pag-update sa ilang Solo Parent Identification Cards (SPIC) aron ma-access ang mga serbisyo nga magamit nila ug masiguro nga dili sila mabiyaan sa kalamboan.

Si Assistant Secretary Irene Dumlao, kinsa mao usab ang tigpamaba sa DSWD, niingon nga niadtong Marso 11, ang solo nga mga ginikanan adunay katungod sa expanded package sa social protection services ubos sa Republic Act (RA) 11861, o ang Expanded Solo Parents’ Welfare Act.

Gipasabot niini nga aron maka-access sa nagkalain-laing programa ug serbisyo sa gobyerno gikan sa ubang mga institusyon nga gidesinyo sa pagsuporta sa solo nga mga ginikanan, kinahanglang magparehistro sila sa ilang local government unit (LGU) Solo Parent Office (SPO) ug mag-aplay alang sa SPIC ug booklet.

Sa pagpatuman sa RA 11861, ang tanang solo nga ginikanan ug ilang anak o dependent nga narehistro sa ilang LGU’s SPO awtomatik nga masakop ubos sa National Health Insurance Program (NHIP), nga gidumala sa Philippine Health Insurance Corporation (PhilHealth).

Base sa PhilHealth Circular 2024-0020, ang solo nga mga ginikanan kinahanglang makakuha og SPIC gikan sa SPO sa ilang LGU aron ma-update ang ilang membership record ug ma-tag isip solo parent sa sistema sa PhilHealth.

Ang circular nag-ingon nga ang nasudnong gobyerno mobayad sa premium nga kontribusyon sa solo nga mga ginikanan, samtang kadtong anaa sa pormal nga ekonomiya adunay managsama nga kontribusyon sa ilang amo ug sa nasudnong gobyerno.

Ang gipalapdan nga balaod nagmando usab sa 10 porsyento nga diskwento ug exemption sa value-added tax (VAT) alang sa solo nga mga ginikanan nga mokita og ubos sa P250,000 matag tuig sa pagpalit sa gatas sa ilang anak, pagkaon, micronutrient supplements, sanitary diapers, prescribed medicines, bakuna, ug uban pang medical supplies gikan sa pagkahimugso hangtod sa unom ka tuig ang bata.

Ang Bureau of Internal Revenue (BIR) niisyu usab sa Revenue Regulations No. 1-2023, nga nag-ingon nga ang solo nga mga ginikanan kinahanglang mopresentar sa ilang SPIC ug booklet aron makapahimos sa 10% nga diskwento ug VAT exemption sa mga kwalipikadong pagpalit.

Ang National Housing Authority (NHA) nipagawas usab og memorandum circular nga nagtugot sa solo parents nga adunay balido o updated nga SPIC ug income ubos sa poverty line, sumala sa gideklarar sa Philippine Statistics Authority (PSA), nga adunay patas nga access sa housing opportunities sa NHA projects ug mahimong responsableng miyembro sa Homeowners Association (HOA).

Ang ubang mga benepisyo ubos sa expanded act naglakip sa binuwan nga cash subsidy nga P1,000 gikan sa tagsa-tagsa ka LGU sa solo parent, basta mokita sila og minimum nga sweldo o ubos pa ug dili benepisyaryo sa bisan unsa nga programa sa cash assistance sa gobyerno.

Ang mga solo nga ginikanan ug ilang mga anak adunay access usab sa mga scholarship ug uban pang educational programs gikan sa Department of Education (DepEd), Commission on Higher Education (CHED), ug Technical Education and Skills Development Authority (TESDA). (ecb/PIA7-Bohol)

Gipahinumdom sa DSWD nga ang solo nga mga ginikanan adunay katungod sa expanded package sa social protection services ubos sa Republic Act (RA) 11861, o ang Expanded Solo Parents’ Welfare Act. (YADP). (DSWD/PIA)