Patrol boat alang sa Maomawan,

gisaad para sa CLEC 4: Estavilla

BIEN UNIDO, Bohol, March 12 (PIA)—Dugang patrol boats, kini ang gisaad sa presidente sa League of Municipalities of the Philippines (LMP) Eping Estavilla, ngadto sa mga molupyo sa isla sa Maomawan, isla nga nahimutang 46 minutos gikan sa pantalan sa lungsod.

Isla nga nahimutang sa taliwala sa Danajon Double Barrier Reef nga giila nga usa sa pipila lamang ka talagsaon nga marine geography nga giilang labing produktibo nga puloy-anan ug itloganan sa mga isda ug mga buhilaman sa kadagatan.

Kay ang kasagaran sa nanimuyo sa isla mga mananagat, kinahanglan usab nga may maayong pagdumala sa kahinguhaan dinhi.

Sa pagpanalipod sa malungtaron nga kadagatan, gimugna sa mga silingan nga mga kalungsuran ug mga kaislahan dinhi ang Coastal Law Enforcement Council (CLEC), usa ka award-winning multi-agency ug inter-LGU law enforcement task force nga nagpatuman sa balaod sa kadagatan ug kalikopan.

Isip chairman sa CLEC council sa ilang lugar, kauban sa Ubay, Bien Unido, Carlos P Garcia ug Trinidad, ug sa kahalapad sa kadagatan nga ilang gibantayan, mas daku ang panginahanglan sa patrol boat nga magamit sa hiniusang bahan nga magpatrolya, manggukod ug manakop sa mga nagbansay sa dili malungtaron nga pangisdaan.

Kauban sa Philippine National Police Maritime Group, Department of Environment and Natural Resources, Philippine Coast Guard, Bureau of Fisheries and Aquatic Resources, Bohol Provincial Environment Management Office, Municipal ug Barangay Government, Integrated Bar of the Philippines ug uban pang mga stakeholders, ang CLEC mao nay nag-unang pwersa nga nagbantay sa mga kadagatan ilabi na palibot sa mga kaislahan sa amihanang Bohol.

Si Estavilla nga nangulo sa Most Outstanding Municipal CLEC sa milabay nga tuig, buot lamang usab nga maohatag og dugang pag-aghat sa mga Bantay Dagay sa mga kalungusuran nga lakip sa ilang CLEC 4 nga pamaayohon pa ang ilang koordinasyon alang sa mas epektibong pagpatuman sa balaod.

Samtang natumbok sa Bohol kining mga lugar nga naghupot sa dungog sa Most Outstanding CRM Officer nga si Ginalyn B. Pala, Most Outstanding Coastal Law Enforcement Council (CLEC) nga LGU Bien Unido, Best Performing CLEC Cluster: CLEC Cluster 4 (Bien Unido, Getafe, Pres. Carlos P. Garcia, Talibon, Trinidad), Best Performing Municipal CLEC Team: LGU of Pres. Carlos P. Garcia, Bohol, Most Outstanding Fish Warden: Dondon Ryan A. Barcial, LGU Bien Unido, Most Outstanding Police Environment Desk Officer nga si Police Chief Master Sergeant Fernando C. Lapera, Talibon Police Station ug Most Outstanding Chief of Police nga si Police Captain Ernesto P. Sagarino and Pres. Carlos P. Garcia Police Station, kining mga dapita usab ang may labing lapad nga hagit sa pagpatuman sa balaod.

Isip hepe sa Municipal CLEC Team nga nakapakunhod ngadto sa 90% sa mga illegal nga mananagat sa Pitogo, buot na ni Mayor Estavilla nga palapdon pa ang pagpanalipod, hinungdan nga ang panginahanglan sa patrol boat, iyang gipadayag.

Sa kanunay, ang atong kontra dinhi, ang kawad-on, dili ang tawo, mao nga kinahanglan nato nga pasabton ug trabahoon nga motunhay ang paggamit sa kahinguhaan nga dili maabusohan, dayag sa Mayor nga president sa LMP. (PIABohol)

PAGPALIG-ON SA LAW ENFORCEMENT. Gisaad ni Pres Carlos P. Garcia Mayor Fernando Estavilla ngadto sa mga Bantay Dagat nga sakop sa CLEC sa silingang mga isla sa iyang lungsod nga mohatag og dugang patrol boats, para mas daghan na ang magamhan sa pagbantay sa kalikopan. (PIABohol)