PhilHealth nipasidaan batok

sa peke nga advertisement

TAGBILARAN CITY, Bohol (PIA)--Nipasidaan sa publiko ang Philippine Health Insurance Corporation (PhilHealth) batok sa nikatap nga pekeng advertisement.

Sa maong advertisement, gi-anunsyo nga makadawat og libreng health insurance card nga maghatag og 100% libreng medikal sa pagpacheck-up sa tanang ospital ug may dugang P5,000 alang sa mga gasto sa pagpatambal, bayad sa doktor ug libreng mga tambal.

Aron makapahimos niini, kinahanglang mopalit lang og 1 tube sa Bee Venom joint cream – giingong usa ka produktong hinimo sa US, nga gi-rekomenda sa mga ospital aron tambalan ang sakit sa kasukasuan.

Matud pa sa PhilHealth nga dili tinuod ang maong advertisement.

Gidugang niini nga ang PhilHealth wala moapil sa pagpamaligya sa mga produkto bugti sa pagpa-miyembro sa programa.

Gi-klaro sa state insurer nga awtomatiko ang membership sa Philhealth ug ang paggamit sa benepisyo diha-diha dayon ingon sa nakalatid sa Universal Health Care Law.

Gi-klaro sa PhilHealth nga kinahanglan lamang nga magparehistro ang miyembro sa bisan asang local health insurance office aron magbaton og permanenteng PhilHealth Identification Number.

Ang PhilHealth ID makuha sa mga buhatan sa PhilHealth nga libre.

Matud pa nga ang gipakitang ID sa advertisement peke usab.

Tungod niini, gipahinumdoman ang tanan nga magbinantayon ug mag-amping sa ilang makita ug mabasa sa social media aron makalikay sa mga sayop nga impormasyon. (ecb/PIA7-Bohol)

Matud pa sa PhilHealth nga kining nikatap nga advertisement dili tinuod. Gi-klaro niini nga wala moapil ang PhilHealth sa pagbaligya og mga produkto bugti sa membership sa programa ug ang membership niini awtomatiko ug ang paggamit sa benepisyo diha-diha dayon sama sa nakalatid sa Universal Health Care Law. (PhilHealth/PIA)