AFP may 133% usbaw sa ilang subsistence allowance

TAGBILARAN CITY, Bohol (PIA)--Gi-doble ni Presidente Ferdinand R. Marcos Jr. ang inadlaw nga subsistence allowance sa mga personahe sa militar, nga katapusang nadugangan niadtong 2015, o 10 ka tuig na ang milabay.

Ubos sa Executive Order No. 84, nga gilagdaan sa Presidente niadtong Biyernes, ang matag miyembro sa Armed Forces of the Philippines makadawat na og P350 sa inadlaw nga subsistence allowance, o 133 porsiyento nga usbaw gikan sa ilang kasamtangang inadlaw nga gahin nga P150.

Nakalatid sa EO nga ang kasamtangang subsistence allowance sa militar dili na igo aron matubag ang adlaw-adlaw nga sustento sa usa ka aktibo sa katungdanan nga sundalo, nga mahinungdanon alang sa ilang kaayohan ug pagbuhat sa ilang mga katungdanan.

Ang subsistence allowance sa AFP katapusang gi-adjust niadtong 2015 subay sa Congress Joint Resolution No. 5 (s. 2015).

Ang pag-usbaw maglakip usab sa mga trainees ug probationary second lieutenants/ensigns nga nag-training, Citizen Military Training cadets, ug mga reservist.

Ang pondo nga gikinahanglan sa pagpatuman sa usbaw magagikan sa mga magamit nga appropriations alang sa AFP ubos sa General Appropriations Act for Fiscal Year 2025 (Republic Act No. 12116) ug uban pang tinubdan sa pondo nga giila sa Department of Budget and Management (DBM).

Ilakip usab sa AFP ang mga kinahanglanon sa pondo alang sa pagpadayon sa pagpatuman sa pagsaka sa umaabot nga mga sugyot sa budget.

Ang mando mo-epekto dayon sa pagmantala niini sa Official Gazette o sa usa ka pamantalaan nga may kinatibuk-ang sirkulasyon. (ecb/PIA7-Bohol)

Gi-aprobahan na ni Presidente Ferdinand R. Marcos Jr. ang EO 84, nga magpatuman sa retroactive nga pagsaka sa subsistence allowance sa AFP gikan P150 ngadto na sa P350 matag adlaw, epektibo Enero 1, 2025. (PCO/PIA)