Scholarship exams schedule gipagawas sa Kapitolyo

TAGBILARAN CITY, Bohol (PIA)--Ang Panggamhanan sa lalawigan sa Bohol, pinaagi sa Education Development Center, opisyal nga nipagawas sa eskedyul alang sa qualifying examinations alang sa Carlos P. Garcia (CPG) Scholarship Program ug sa Bohol Education Subsidy Program (BESP).

Sa paghatod sa inklusibo, accessible ug dekalidad nga edukasyon nga gilantaw sa Strategic Change Agenda, kini nga mga eksaminasyon ipahigayon sa lainlaing mga lugar sa tibuuk lalawigan aron ma-accommodate ang mga aplikante gikan sa nagkalain-laing lungsod sa Bohol.

Magsugod ang eksaminasyon sa Abril 22, 2025, sa Ubay 1 Central Elementary School alang sa mga aplikante gikan sa mga lungsod sa Ubay, Trinidad, Bien Unido, ug Carlos P. Garcia.

Sa Abril 23, 2025, ang eksaminasyon ipahigayon sa Getafe Central Elementary School alang sa mga aplikante nga gikan sa lungsod sa Getafe, Buenavista, Danao, ug Talibon.

Ang sunod nga testing site mao ang Sagbayan Central Elementary School sa Abril 24, 2025, naglangkob sa mga aplikante gikan sa mga lungsod sa Sagbayan, San Isidro, Clarin, ug Inabanga.

Sa Abril 25, 2025, ang eksaminasyon ipahigayon sa Carmen West Central Elementary School alang sa mga examinees gikan sa mga lungsod sa Carmen, San Miguel, Dagohoy, Batuan, ug Sierra Bullones.

Sa katapusan, alang sa unang hugna sa eksaminasyon sa Abril 26, 2025, ang venue ipahigayon sa Candijay National High School alang sa mga aplikante sa mga lungsod sa Candijay, Pilar, Alicia, Mabini, Guindulman, ug Anda.

Ang ikaduhang hugna sa eksaminasyon magsugod sa Abril 29, 2025, sa Garcia-Hernandez Central Elementary School, alang sa mga aplikante gikan sa Garcia-Hernandez, Dimiao, Valencia, Jagna, ug Duero.

Sa Abril 30, 2025, ang Loboc Central Elementary School mo-accommodate sa mga examinees gikan sa mga lungsod sa Loboc, Bilar, Sevilla, Loay, ug Lila.

Ang mga eksaminasyon ipadayon sa Mayo 2, 2025, sa Loon South Central Elementary School alang sa mga aplikante gikan sa Loon, Tubigon, Calape, ug Maribojoc.

Samtang sa Mayo 3, 2025, ipahigayon sa Dr. Cecilio Putong National High School alang sa mga aplikante gikan sa syudad sa Tagbilaran, Balilihan, Cortes, Catigbian, ug Antequera.

Ang katapusang adlaw sa qualifying examinations gitakda sa Mayo 6, 2025, sa Dr. Cecilio Putong National High School, nga magsilbi sa mga aplikante gikan sa Baclayon, Albur, Corella, Sikatuna, Dauis, ug Panglao.

Gipahinumduman ang mga examinees nga ang eksaminasyon sa CPG Scholarship Program ipahigayon gikan sa alas 9:00 hangtod alas 11:00 sa butag, samtang ang BESP exam ipahigayon gikan ala 1:00 hangtod alas 3:00 sa hapon.

Ang mga kwalipikado nga aplikante kinahanglan nga mga gradwado sa senior high school o umaabot nga first-year college student nga mogradwar nga adunay pasidungog ug gikan sa mga pamilya nga ubos ang kita.

Dugang pa, kinahanglan silang magplano nga magpalista sa bisan asa nga pribadong unibersidad o kolehiyo sa Bohol, dili apil kadtong mga institusyon nga ubos sa Tertiary Education Subsidy o nagtanyag og Free Higher Education.

Ang CPG scholarship program nagtanyag og P6,000 alang sa tuition fee matag semester ug P1,000 binuwan nga allowance, samtang ang BESP naghatag og P4,000 alang sa tuition fee matag semester.

Gi-awhag ang mga aplikante nga moabot og sayo sa ilang gitudlo nga mga lugar ug dad-on ang mga kinahanglanon alang sa hapsay nga proseso sa eksaminasyon. (ecb/PIA7-Bohol)