1 lane San Isidro-Corella road

sirad-an kay trabahoon- DPWH

TAGBILARAN CITY, Bohol (PIA)—Sugod Hunyo 19, 2025 hangtud libkason na sa Department of Public Works and Highways (DPWH), ipatuman ang pagsira sa usa ka lane sa tunga sa kilometro katas-on nga karsada sa San Isidro paingon sa Corella.

Kini tungod sa pagpahiluna sa reconstruction, pag-upgrade ug pagpalapad sa kasamtangan nga duha ka lane nga aspaltado nga karsada ngadto na sa upat ka lanes nga semento, segun pa ni Engr. John Paul Gascon, District Engineer sa PDWH-1.

Niini, ang apektado nga bahin sa karsada mao kadtong duol sa DU Pie Gasoline Station unahan sa eskina sa San Isidro Elementary School ngadto sa Gas Saver Gasoline Station sa San Isidro-Corella road.

Nunot niini, gitambagan ang nga motorista ug ang mga manakayay dinhi nga ruta, sa pagplano na nga daan aron dili mauwahi sa adtoan o trabahoan, ug sa pagpangita na daan og lain’g agi-anan kon dili buot malangan.

Hinuon, mingpasalig usab ang DPWH nga magbutang og traffic personnel aron magpahiluna sa traffic ug ipatuman ang kahapsay ug luwas nga pagbyahe. Niini usab, nangayo og dispensa ang DPWH. (PIABohol)