Bohol, wala pa maapil sa

‘Walang Gutom Program’

TAGBILARAN CITY, Bohol (PIA)—Gustohon man ni Gobernador Erico Aristotle Aumentado nga makabenepisyo og apil ang mga Bol-anon sa programa sa Walang Gutom Program (WGP) nga gipatuman sa Department of Social Welfare and Development (DSWD), dili pa maapil ang mga Bol-anon niini.

Kini maoy gipasabut ni DSWD 7 Regional Director Shalaine Marie Lucreo, didto sa labing bag-o nga tigum sa Regional Development Council, nga si Aumentado maoy chairman.

Didto sa ikaduhang full council nga tigum sa Regional Development Council 7 didto sa Kapitolyo niadtong Hunyo 10, gitaho ni RD Lucero nga ang Sugbo lakip sa mga benepisaryo sa WGP sa nasudnong kagamhanan.

Ang WGP usa ka programa sa kagamhanan nga gitumong sa pagbuntog sa kagutom ug subay sa ilang Food Stamp Program, pinaagi sa Walang Gutom Kitchen, magpakaon ang goberno og liboan ka mga katawhann nga temporaryong gigutom, gikan sa 34 ka mga lalawigan nga nasukip isip prayoridad nga mga lalawigan sa Philippine Plan of Action for Nutrition (PPAN), pasabut ni RD Lucero.

Ug gamit ang Family Income and Expenditure Survey ug ang Poverty Data sa 2023 sa Philippine Statistics Authority, natumbok sa kagamhanan ang 34 ka mga lalawigan nga adunay halapad nga suliran sa kagutom.

Sa nasampit nga mga datus sa PSA, ang Bohol anaa sa ika 25 nga pwesto sa kabag-on sa kabus, samtang ang Sugbo, ika duha.

Ug sa mga kabus nga nagkalisud og kaon katulo sa usa ka adlaw, ika 20 ang Bohol samtang ika duha gihapon ang Sugbo sa tibuok nasud.

Nunot niini, wala masulod ang Bohol sa mga prayoridad nga lalawigan, dayag ni RD Lucero.

Hinuon, matud usab sa opisyal sa DSWD, gilaraw na sa nasudnong kagamhanan nga palapdan pa ang mga lalawigan nga makabenepisyo sa Walang Gutom Program, sa sunod nga mga tuig. (PIABohol)

BASTA KAAYOHAN SA BOL-ANON. Buot ni Gob Erico Aris Aumentado nga ma-apil na ang Bohol sa Food Stamp Program sa DSWD nga karon mao na ang Walang Gutom Program nga magpakaaon sa mga kabus nga gipanggutom, human napadayag sa survey nga nagkalapad ang kagutom sa nasud. Hinuon, maayo ang ranggo sa Bohol kon itandi sa ubang lalawigan, matud ni DSWD RD Shalaine Marie Lucero (PIABohol)