RDC-7: ipasagop ang teknolohiya

Pagpalig-on sa mga balay sa CV

TAGBILARAN CITY, Bohol (PIA)—Dala sa panginahanglan nga mapalig-on ang mga panimalay sa rehiyon nga permi agi-an sa mga katalagman, giaghat sa Central Visayas Regional Development Council (CV-RDC) ang pagsagop sa usa ka teknolohiya nga maghatag pagpalig-on sa mga balay, labi na kadtong walay tataw nga pundasyon pagtukod niini.

Teknolohiya nga gitawag og Column Footing Grade Beam Monolith (CFGBM), kini nagsukip sa pagpalig-on sa gisemento nga mga pundasyon sa matag poste sa balay ug pagtagik niini pinaagi sa sementado nga sagbayan nga gilubong sa yuta, ug gikas-a og buhos (monolithic) aron mas mapalig-on ug mas pulido nga balay batok sa pagtay-og ug baha.

Usa ka teknolohiya nga gapagawas gikan sa pagpatuon nga gihimo sa Habitat for Humanity International (HHI), kini wala na manginahanglan nga gub-on pa ang balay, ug kay natagik sa mga haligi, mas mabahin ang kabug-aton sa balay nga makalahutay sa tay-og ug kusog nga hangin.

Ang nasampit nga teknolohiya, magpasayon usab sa pagkamada sa hollow blocks, menos og gasto ug nagkinahanglan sa mga materyales nga dali rang mapalit.

Kon mapasagop, nagtuo ang konseho sa rehiyon nga mapasugdan na og pauso ang mga balay nga makalahutay sa mga katalagman nga moigo.

Gani, matud ni Gobernador Erico Aristotle Aumentado nga ila na nga girekomendar ngadto sa Department of Public Works and Highways (DPWH), Department of Human Settlements and Urban Development (DHSUD), apil ang mga ahensya nga taput niini, aron sagopon ang teknolohiya ilabi na sa pagpahimutang niini sa mga gabayan sa pagkuha og mga financing sa giaplay nga housing loans.

Gihangyo usab sa konseho ang Office of the Civil Defense Central Office ug ang National Disaster Risk Reduction Management Council basig pwede nga kapundohan pinaagi sa calamity funds niini ang mga LGUs nga mogamit sa nahisgutan nga teknolohiya sa pagpalig-on sa mga balay aron makalahutay na kini sa mga katalagman.

Gawas pa, gihangyo usab sa RDC pinangulohan ni Aumentado -CV ang Home Development Mutual Fund (HDMF o Pag-IBIG Fund), Social Housing Finance Corporation (SHFC), ug ang National Home Mortgage Finance Corporation (NHMFC) nga ikonsiderar ang sistema sa financing alang niadtong buot mogamit sa teknolohiya.

Nagtuo ang RDC nga kon kining teknolohiya sagopon sa mga national government agencies, local government units, non-government organizations, environment professionals, architects ug civil engineers, kadtong mga kabus makahimo na sa pagpatuman niini sa ilang mga balay nga luwas nga puy-an taliwala sa katalagman. (RAHC/PIA-7/Bohol)

GIPAPATIN-AW. Nabag-ohan sa gihinganlan nga teknolohiya, gipangutana ni Bohol Gob Erico Aris Aumentado ang DPWH pinaagi ni Regional Director Danilo J. Villa Jr., kon unsa gayud ang nasampit nga teknolohiya nga maklakahutay sa kusog nga linog. (PIABohol)