14 ka kandidata sa Miss Bohol

Gipadayag sa Sandugo launch

TUBIGON, Bohol (PIA)—Una nga gikapadayag ngadto sa publiko ang mga dalaga nga maoy masentro sa kalihukan sa pagkaplag sa Miss Bohol 2025 atul sa tulo ka buwan nga kasaulogan sa Sandugo sa Bohol nga gilusad, Hunyo 15, 2025, sa Centro Tubigon, Bohol.

Segun sa mga tigpasiugda, adunay 16 ka mga dalaga nga mipadayag sa ilang interes sa pag-salmot, apan 14 pa ang nakakuha sa opisyal nga pagsuporta sa ilang mga tagsatagsa ka kalungsuran.

Si Miss Bohol 2024 Cayle Tejano Tentativa, representante sa Garcia Hernandez, kinsa mingdaug sa bangga sa kaanyag ug kalantip sa pangisip apil na ang gaan nga personalidad niadtong 2024, mipaila sa mga naglaum nga mosunod sa iyang korona, atul sa paglusad sa Sandugo dinhi sa Tubigon.

Sila nga mga kandidata mao sila: Jacky Fe T. Melencion (Dauis), Kimberly Grace L. Giroud (Panglao), Cyndi Marie Novo (Jagna), Reniela Marie A. Barniego (Anda), Mary Ingrid Pajo Orevillo (Valencia), Rose Cabando (Talibon), Czarina Aeri Rollorata (Duero).

Abegail T. Celis (Getafe), Katrina Maye Tabigue (Buenavista), Claire Anne F. Radoc (Tubigon), Princess Melyn Joy Vallejos (Mabini), Mary Love Lopez (Tagbilaran City), Katherine Topsnik (Guindulman) ug Kyla Mariz A. Ungay (Ubay).

Hinuon, ang mga kandidata, mingsalmot na sa Independence Day nga mga kalihukan didto sa Kapitolyo, bisan pa kon wala pa ikapresentar sa publiko.

Sa paglusad sa Sandugo 2025, ikaduha nga higayon nga kini gihimo gawas sa Tagbilaran City, si Gobernador Erico Aristotle Aumentado mibutyag nga kini nga makasaysayon nga paghandum, kinahanglang mabati sa tanan nga Bol-anon, dili lamang sa mga taga Tagbilaran, aron mabutang sa kasingkasing ug galamhan ang garbo sa Sandugo nga pagpakighigalaay, pakig-inigsoonay ug ang pagpangita sa kalinaw.

Ang search for Miss Bohol 2025, kalabut na sa mas gipadak-an ug mas gipabibo nga tulo ka buwan nga pagsadya sa Bohol nga motapos sa Agosto 31. (PIABohol)

MAANYAG 14. Gipresentar ni Miss Bohol 2024 Cayle Tentativa ug ni Gob Erico Aristotle Aumentado ang 14 ka mga Bol-anong nangandoy nga makasunod sa korona ni Tentativa ug mahimong ambassador sa Bohol sa Sandugo. (PIABohol)