Jagna Forest Land Use

Plan gilusad ni Rañola

JAGNA, Bohol (PIA)—Napulo ug usa ka adlaw diha nga opisyal nga taposon ni Jagna Mayor Joseph Ranola ang iyang duha ka termino, pormal nga gilusad niini ang 164 ka pahina nga Forest land Use Plan (FLUP) sa lungsod alang sa 2024 ngadto na sa 2033.

Sa us aka yano nga seremonyas didto sulod sa buhatan sa mayor sa bag-ong munisipyo sa lungsod, ug gisaksihan sa mga opisyales sa Office of the Civil Defense, mga kanhing politico ug nga sakop sa Bohol Tri media Association, gibuytag ni Ranola nga sa kinatibuk-an nga 12.036 ektaryas nga luna sa lungsod, 2,000 ektaryas niini gideklara na nga forest lands.

Mas maayo gyud nga mapahimutang na nga daan ang mga plano sa pagpanalipod ug pagpatunhay, lakip na ang pagdumala sa mga kalasangan sa lungsod aron magiyahan ang mga katawhan sa pagtamud niini, dayag sa mayor.

Sa nasampit nga FLUP, nahasubay didto ang kinatibuk-ang dagway sa mga kahinguhaan sa mga kalasangan ug mga gipanalipdan nga mga lugar sa Jagna: mga lam-aw, linaw, katubigan, tubod, sapa ug mga danawan, mga langub u gang mga kahinguhaan sulod niini, ang potensyal sa turismo niining mga lugara u gang mga sugyot alang sa paggamit sa lasang.

Gimapa na usab ang mga possible nga delikadong lugar alang sa mga molupyo, nga kasamtangang nanimuyo niini ug mga hisgutanan nga angayan pang mahatagan og mga katin-awan.

Ang FLUP naghatag sa mga molupyo sa mga possible nga mga pamaagi nga ang mga kalasangan, mahimo pang mas produktibo, sama sa mga sugyot sa paghimo og mga kalihukan sa turismo nga adunay minimal nga epekto sa lugar.

Napakita usab didto ang potensyal sa wind energy sa Barangay Odiong, Boctol ug Balili.

Sa kinatibuk-an, Makita ang panginahanglan sa us aka Municipal Forest Land Management Steering Committee, plano sa pagmonitor ug ang pagpatuman sa work ug financial plans dinhi. (PIABohol)

GIYA SA PAGGAMIT SA KALASANGAN. Sulod sa 10 ka tuig nahipno na sa lungsod sa Jagna ang pagdumala sa ilang 2000 ektaryas nga kalasangan ug naumol na niini ang Forest Land Use Steering Committee aron maoy magdumala niini, bisan pa kon wala na ang mayor. (PIABohol)