‘Bantawan’ gibuksan alang sa bag-o,

mas dakong Sandugo sa Bohol 2025

TAGBILARAN CITY, Bohol (PIA)--Opisyal nang gibuksan niadtong Hunyo 16 ang Bantawan, ang Sandugo sa Bohol festival tambayan karong tuiga nga nahimutang sa runway sa Old Airport ning dakbayan sa Tagbilaran.

Naghatag og bag-ong kinabuhi sa karaang tugpahanan isip usa ka lifestyle hub, gihulagway ni Gob. Erico Aristotle Aumentado ang Bantawan nga usa ka bintana sa adunahang kasaysayan, kultura ug kabilin sa Bohol.

“It is more than just a window for our festivities. Bantawan is a snapshot of the Boholano's close connection with its surrounding environment, highlighted by our designation as the country's first and only UNESCO Global Geopark and Regenerative Island (Kini labaw pa sa usa ka bintana alang sa atong mga kasaulogan. Ang Bantawan usa ka snapshot sa suod nga koneksyon sa Boholano sa iyang palibot, nga gipasiugda sa atong pagkatudlo isip labing una ug bugtong UNESCO Global Geopark ug Regenerative Island nga nasud),” matud pa ni Aumentado sa mensahe nga gihatag ni Provincial Administrator Asteria Caberte.

Matud pa nga ang Bantawan usa ka repleksyon kung giunsa sa atong mga mithi ang pag-umol sa pagkatawo sa Bohol sulod sa mga katuigan, uban sa atong mga tawo - ang pinakaimportante nga kabtangan niini - nga adunay mahinungdanong papel sa pagduso sa pag-uswag sa atong probinsya sa unahan.

Gipasigarbo sa Bantawan karong tuiga ang kapin sa 70 ka partner nga mga negosyante, nga nagtanyag og han-ay sa mga produkto sa pagkaon ug dili pagkaon.

Sa niaging tuig, ang Sandugo Executive Committee nakarehistro og average nga 14,000 ka tawo kada adlaw sa Bantawan.

Ang kalihokan mikita og P43 milyones niadtong 2024, mas taas sa P36 milyones nga kita niadtong 2023.

Si Gelena Asis-Dimpas, Assistant Regional Director sa Department of Tourism (DOT) Region 7, mipahalipay sa Bohol ug sa ilang liderato ug mipadayag og garbo sa paglambo sa turismo isip komunidad.

Matud pa niini nga ang Bantawan nagtanyag og kahigayonan sa mga turista nga mapahimuslan ang ilang pagbisita sa probinsiya ug makompleto ang ilang kasinatian sa Bohol.

Si Caberte ug Dimpas, uban sa mga opisyal sa probinsiya ug mga bisita nangulo sa ribbon cutting rites aron opisyal nga buksan ang Bantawan.

Gipasiugda sa Bantawan ang 3 ka buwan nga selebrasyon sa Sandugo sa Bohol 2025, uban sa mga streams sama sa Tabo, Bibo, Tigi, Tapok, Baras ug Atiman.

Ang mga stall bukas kada adlaw gikan sa alas 4:00 sa hapon hangtod sa alas 10:00 sa gabii sa tibuok kasaulogan sa Sandugo.

Alang sa kompletong listahan sa mga aktibidad ug eskedyul, mahimong bisitahon ang sandugo.bohol.gov.ph. (ECB/PIA7-Bohol)

Bukas na ang Bantawan nga nahimutang sa runway sa Old Airport ning dakbayan sa Tagbilaran diin gipasigarbo niini karong tuiga ang kapin sa 70 ka partner nga mga negosyante, nga nagtanyag og han-ay nga mga produkto sa mga pagkaon ug uban pa. (ECB/PIA7-Bohol)