Calendar of activities alang sa 

2025 BSKE gipagawas sa Comelec

TAGBILARAN CITY, Bohol (PIA)--Gipagawas sa Commission on Elections (Comelec) ang kalendaryo sa mga kalihokan alang sa 2025 Baranggay ug Sangguniang Kabataan elections (BSKE) karong Disyembre.

Ubos sa Comelec Resolution No. 11132, ang poll body nagtakda sa Election Day alang sa BSKE sa Disyembre 1, 2025, adlaw’ng Lunes.

Ang mga botante mahimong mobotar gikan sa alas 7 sa buntag hangtod sa alas 3 sa hapon, apan ang Comelec motakda na usab og early voting hours alang sa mga senior citizens, persons with disabilities ug mga mabdos.

Ang pag-ihap ug pag-canvas sa mga boto ug proklamasyon sa mga midaog nga kandidato mosunod dayon human sa pagsira sa mga botohan.

Ang rehistrasyon sa mga botante ug mga aplikasyon alang sa membership sa Katipunan ng Kabataan (KK) magsugod sa Hulyo 1 hangtod 11, 2025.

Sa laing bahin, ang katapusang adlaw sa pagpasaka og oposisyon alang sa aplikasyon alang sa voter registration ug KK members gitakda sa Hulyo 21.

Ang ubang mga naka-iskedyul nga mga kalihokan mao ang mosunod:

Hulyo 25–katapusang adlaw sa pagpahigayon og inspeksyon sa mga voting center/polling places

Hulyo 28–pag-aprobar o dili pag-apruba sa mga aplikasyon alang sa pagparehistro sa mga botante ug pagkamiyembro sa KK; ang listahan sa giaprobahan ug gibalibaran nga mga aplikasyon i-post sulod sa lima ka adlaw gikan sa desisyon

Agosto 8–katapusang adlaw sa pag-file og hangyo alang sa pagbalhin/pagbag-o/pagtul-id sa ngalan/address sa mga voting centers/polling precincts

Agosto 18–katapusang adlaw sa pagsang-at og petisyon alang sa pagpaapil sa mga botante

Agosto 25 hangtod Setyembre 15–onsite project of precincts (POPs) verification

Agosto 26–katapusang adlaw sa pag-file og petition for exclusion sa mga botante

Agosto 28–katapusang adlaw alang sa election registration board (ERB) meeting aron pag-certify sa listahan sa mga botante ug pag-apruba sa proseso sa abatement sa VRS database

Agosto 28–katapusang adlaw alang sa ERBs, citizen arms, civic organizations sa pag-verify, certify, ug pagselyo sa listahan sa mga botante alang sa BSKE

Setyembre 2–katapusang adlaw sa pag-post sa BSKE certified ug final computerized voters’ list

Oktubre 1 hangtod Oktubre 7–pag-file sa mga sertipiko sa kandidatura

Oktubre 6–deadline sa pagsumitir sa mga POPs sa Comelec en banc

Oktubre 27 hangtod Disyemre 31–panahon sa eleksyon

Nobyembre 20 hangtod Nobyembre 29–panahon sa kampanya

Nobyembre 30–bisperas sa Adlaw sa Eleksiyon

Disyembre 31–katapusang adlaw sa pag-file sa Statements of Contribution and Expenditures (SOCEs).

Sa laing bahin, ang Comelec Resolution No. 11132 naglatid usab sa gidili nga mga buhat atol sa campaign period paingon sa Election Day. (ECB/PIA7-Bohol)

Niadtong Lunes, Hunyo 9, gipasalig ni Comelec chairman George Erwin Garcia nga ang barangay ug Sangguniang Kabataan elections (BSKE) ipahigayon sa Disyembre 1 ning tuiga sigon sa gitakda. (Comelec/PIA)