NIA nagsaulog sa ika-62 nga anibersaryo;

bloodletting activity gipahigayon

TAGBILARAN CITY, Bohol (PIA)--Sa pagsaulog sa ika-62 nga anibersaryo sa pagkatukod niini, ang National Irrigation Administration (NIA) Region VII nipahigayon og bloodletting activity niadtong Hunyo 9, 2025 sa NIA R7 CVTC Function Hall sa barangay Dao, ning dakbayan sa Tagbilaran.

Ang kalihokan gihimo uban sa pakigtambayayong sa Philippine Red Cross - Bohol Chapter ug nagtumong sa pagtabang sa pagtubag sa kritikal nga panginahanglan sa dugo sa mga lokal nga ospital ug pasilidad sa panglawas sa probinsiya.

Tungod kay ang ahensya nagsaulog man sa 62 ka tuig nga serbisyo, 62 usab ka grocery package gikan sa NIA Region VII ang gipanghatag isip timaan sa pagpasalamat sa mga malampuson nga mga donor.

Si NIA Region VII Acting Regional Manager Engr. Antonio B. Gujeling mihatag og gibug-aton sa kaimportante sa matag donasyon.

“Each donation makes a significant difference—every bag collected has the potential to save lives (Ang matag donasyon makahimo og dakong kalainan—matag bag nga nakolekta adunay potensyal nga makaluwas og mga kinabuhi),” matud pa ni Gujeling.

Gipangunahan niini mismo ang pag-donar og dugo.

Malampuson nga nakolekta sa kalihokan ang 34 ka bag sa dugo gikan sa mga empleyado sa NIA, mga representante sa mga ahensya nga kauban, ug mga miyembro sa komunidad.

Pinaagi sa mga inisyatibo nga sama niini, ang NIA Region VII nagpamatuod pag-usab sa pasalig niini sa serbisyo publiko—dili lamang pinaagi sa malungtarong pagpalambo sa irigasyon kondili pinaagi usab sa pagsuporta sa mga programa nga nagpasiugda sa panglawas sa publiko ug kaayohan sa komunidad. (ECB/PIA7-Bohol)

Nagtambayayong sa pagluwas og kinabuhi ug pagsaulog sa 62 ka tuig nga pagserbisyo pinaagi sa #bayanIAn! Isip pagsaulog sa ika-62 nga anibersaryo sa pagkatukod niini, ang NIA Region VII nipahigayon og bloodletting activity niadtong Hunyo 9, 2025 sa NIA R7 CVTC Function Hall sa barangay Dao, dakbayan sa Tagbilaran. (hulagway sa NIA-VII)