Kabatan-onan giaghat magpa ‘HIV screening’

By Rey Anthony Chiu

TAGBILARAN CITY, Bohol (PIA) — Sa mga kabatan-onan nga nahilakip sa 15 ngadto sa 25 ang pangedaron ilabi na kadtong may mga taas sa risgo nga kinaiya sa pagpakiglambigit sa uban, miaghat ang mga tinugyanan sa Bohol sa pagpascreen sa Human Immunodeficiency Virus (HIV).

Ang HIV us aka matang sa kagaw nga kon makasulod na sa lawas, iyang gub-on ang sistema sa panalipod sa lawas hinungdan nga ang mga anti-bodies, dili na moresponde pa sa pagsulod sa bisan unsa nga hinungdan sa sakit, ug gub-on niini ang pamaagi sa lawas nga mapahiuli gikan sa sakit.

Kini samtang gipadayag sa Gov Celestino Gallares Memorial Medical Center (GCGMMC) nga ang kasagaran nga nagpakitag positibo nga presensya sa HIV kadtong nakasinati og penetrative sex, kadtong nakasunod sa kagaw gikan sa ginikanan, o nakigsawo sa dagum sa lain-lain nga mga tawo.

Kini usab ubay sa taho nga mikalit og daghan ang kaso sa mga tawo nga nagpuyo na uban sa HIV (people living with HIV) sa mga nagpangedaron og 15-25.

Ang Provincial Health Office (PHO) sa Bohol ug ang GCGMMC adunay mga pasilidad sa pagscreen sa us aka tawo aron ilhon kon may nakasulod ba nga virus sa lawas,” matud ni HIV Case manager Reyn Camartin, atul sa Kapihan.

Matud ni Cris Estomago, medical technologist sa PHO, ”dili lamang derecho nga HIV screening ang ikatanyag sa PHO, apil na usab ang pagtambag ug edukasyon ngadto sa mga katawhan aron mas magamhan kini sa unsay saktong buhaton kon ugaling magpositibo sa HIV.“

Kini usab an gang gipadayag ni Aida Ligason, medical technologist sa GCGMMC, kinsa mingdugang sa pag-ingon nga bukas sila dili lamang sa oras tingtrabaho apan bisan sa gabii.

Ang GCGMH nagpabukas sa labing unang HIV Treatment Hub sa Bohol, nga karon gihinganlan na og Piskay Clinic.

Alang sa serbisyo nga gikinahanglan, mahimo nga mokontak sa www.piskayclinicbohol.com. (RAHC/PIA Bohol)

SUNDOWN CLINIC. Alang sa mga tawo nga walay higayon sa oras tingtrabaho nga magpa HIV screening, ang Piskay Clinic sa luto sa Gallares Medical Center bukas bisan sa mga oras nga dili tingtrabaho, aron makaserbisyo sa mas daghang Bol-ano, matud ni Cris Estomago ug Camartin. (PIA Bohol)