P32 M Jagna recycling facility

Solusyon paghipos sa basura

JAGNA, Bohol (PIA)—Gikan sa kinatibuk-an nga pamuhunan nga mikabat sa P32 milyones, nahatagan dyutay nga solbad ang suliran sa basura sa lungsod, samtang mahibalik niini ang kwarta nga ilang makuha gikan sa girecycle nga basura.

Sa kritikal nga suliran sa basura ilabi na sa Jagna nga may mga sapa-sapa nga makapaanod sa dili mahipos nga basura ngadto sa kadagatan nga ilang gisaligan sa pagpangisda, napatukod sa lungsod sa paghingusog ni Mayor Joseph Rañola ang Jagna Ari Eco Park didto sa Tubod Mar, isip usa ka complex sa pagrecycle sa basura aron makuha ang shredded plastic nga ilang ikabaligya, pulpog nga mga botelya ug bildo aron isahug sa ilang tinableya nga bricks, ug mga abono gikan sa ilang composting facility.

P21 milyones nga recycling facility, P5 milyones nga solar set-up nga nagpadagan sa proseso sa recycling, P5 milones nga building ug lain nga P1 milyon alang sa ginangmay nga galastohan sa operations and kinatibuk-an nga puhunan aron tangtangon ang labad sa ulo sa mga katawhan ug opisyals a lungsod.

Ang Jagna may gikan sa napulo ngadto sa 12 toneladas nga basura nga malabay matag adlaw, ug kon dili madumala og sakto, dili halayo ang pagkapukan sa pag-ugmad sa lungsod tungod sa basura niini, matud pa sa Municipal Environment Officer.

Pinaagi sa kompleto nga recycling facility, dali ra niining mahipos ang 6 ka tonelada nga mga basura nga plastic nga empakehon ug ibaligya ngadto sa Cemex sa Sugbo aron gamiton nga sugnod sa paghimo og semento.

Sa mga basura nga bildo ug botelya, dugmokon kini ngadto sa pino nga sama og bonbon aron ikasagol sa gipanghimo nga mga bricks nga ilatag sa mga parke sa lungsod.

Ang mga basura usab nga malata, kini sahugan sa organic nga sahog aron dali nga malate ug mahimong abono, nga gigamit usab sa agri-demo farms nga anaa sulod sa complex.

Sa kinatibuk-an, halos tanan nga basura nga mahidangat sa recycling facility, may gamit pa, o mahalin pa nga ikabalik ngadto sa LGU isip ginansya, samtang gihatagan og solbad ang suliran niini sa basura. (PIABohol)

BASURAHAN NGA SUROYANAN. Ubos sa recycling facility sa Jagna, anaa ang parke nga kasuroyan: lugar nga lisud maiisip kon may duol nga basurahan. Apan tungod sa maayong polisiya sa pagbahig daan sa basura sa dili pa ilabay, namenosan ang langaw ug baho nga sagad dili mabuwag sa mga labuganan sa sagbot. (PIABohol)