Pagdumala sa BPIA opisyal nang gitugyan sa

DOTr ug CAAP ngadto sa Aboitiz InfraCapital

TAGBILARAN CITY, Bohol (PIA)--Opisyal nang gitugyan sa Department of Transportation (DOTr) ug Civil Aviation Authority of the Philippines (CAAP) niadtong Lunes, Hunyo 16, ang operasyon ug pagdumala sa Bohol-Panglao International Airport (BPIA) ngadto sa Aboitiz InfraCapital, ang infrastructure arm sa Aboitiz Group.

Ang BPIA, nga gitawag og “Green Gateway to the World” mao na ang ikatulo nga tugpahanan ubos sa pagdumala sa Aboitiz InfraCapital sunod sa Mactan-Cebu International Airport (MCIA) ug Laguindingan International Airport.

Gisaksihan ang pagtugyan nila CAAP Deputy Director-General Danjun G. Lucas, CAAP Director-General Lieutenant-General Raul L. Del Rosario (Ret.), MCIA CEO Athanasios Titonis, ug Aboitiz InfraCapital Airports Service Company Head of Operations and Security Ronald R. Mangahas.

Ang Aboitiz InfraCapital, Inc. (AIC), ang imprastraktura nga bukton sa Aboitiz Group, opisyal nga mipuli sa operasyon sa BPIA, nga nagtimaan sa dakong milestone sa nagpalapad nga plataporma sa airports sa kompanya.

“This official handover marks the beginning of a new chapter for Bohol-Panglao International Airport. We are committed to transforming BPIA into a globally competitive gateway that reflects the beauty and hospitality of Bohol, while helping unlock its full tourism and economic potential (Kining opisyal nga pagtugyan nagtimaan sa pagsugod sa bag-ong kapitulo alang sa Bohol-Panglao International Airport. Kami komitado sa pagbag-o sa BPIA ngadto sa usa ka globally competitive gateway nga nagpakita sa katahum ug pagkamaabiabihon sa Bohol, samtang nagtabang sa pagbukas sa iyang hingpit nga turismo ug ekonomikanhong potensyal),” matud pa ni AIC Vice President and Head of the Airports Business Rafael M. Aboitiz.

Ang BPIA, ang ika-siyam nga pinaka-busy nga gateway sa Pilipinas ug usa ka importante nga sentro sa turismo, gitakda alang sa sunodsunod nga giplano nga pag-upgrade ubos sa ₱4.53 bilyon nga public-private partnership.

Sa umaabot nga tuig, palapdan sa AIC ang building sa terminal sa mga pasahero, i-modernize ang mga pasilidad sa landside ug airside, ug i-install ang bag-ong mga sistema ug kagamitan sa airport.

Ang mga inisyal nga pag-uswag makapalambo sa kapasidad sa BPIA gikan sa 2 milyon ngadto sa 2.5 ka milyon nga mga pasahero matag tuig (mppa) sulod sa unang duha ka tuig sa mga operasyon, uban sa umaabot nga mga kalamboan nga magduso sa kapasidad ngadto sa 3.9 mppa sa 2030. (ECB/PIA7-Bohol)

Ang Bohol-Panglao International Airport (BPIA), ika-9 nga pinaka-busy nga gateway sa Pilipinas ug usa ka importante nga sentro sa turismo, gitakda alang sa sunodsunod nga giplano nga pag-upgrade ubos sa ₱4.53 bilyon nga public-private partnership. (hulagway gikan sa BPIA)