Digital payment dako’g abag

sa kaugmaran sa turismo

TAGBILARAN CITY, Bohol (PIA)—Nagtuo ang usa ka opisyal sa Provincial Tourism Council (PTC) nga mas maayo, mas episyente ug walay langan ang digital payment systems, ug mahimo kini nga daku nga pag-ugmad sa pamaagi sa pagnegosyo sa turismong lalawigan sa Bohol.

Sa pagpakighinabi sa Kapihan sa PIA, gipadayag ni PTC Co-chair Atty Lucas Nunag nga pinaagi sa digital payments system, mas paspas, mas episyente ug dili langan sa mga bisita nga moadto pag bangko o ATM, kay cashless na.

That will be a big improvement with the way we conduct our business, dayag sa opisyal nga naglantaw sa kaayohan kon mapalapad pa ang paggamit sa digital system gawas sa international bookings ug pagbayad sa mga hotel services.

Kini usab samtang nagtuo ang mga tinugyanan sa Bangko Sentral ng Pilipinas nga daku og ikatabang ang pagbukas sa digital payments system sa Dauis, Panglao, Loboc, Carmen, Anda ug mga lungsod nga duna nay daghang turista.

Segun sa Bangko Sentral ng Pilipinas, duha pa ka lugar sa Bohol ang nakalagda sa Memorandum of Agreement aron ikapatuman ang cashless payments system sa ilang mga public markets.

Ang syudad sa Tagbilaran u gang lungsod sa Valencia pa ang gikataho nga nakakompleto na sa pagpatuman sa cashless payments pinaagi sa pagsagop sa Paleng-QR Ph, usa ka pagpatigayon nga gipadagan pinaagi sa QR Codes diin ang bayad, adto na ipaagi sa mobile phones.

Hinuon, dinhi sa Bohol, bisan kon duha pa lamang ka lugar ang nakalagda sa pagpatuman sa sistema nga gidumala sa Bangko Sentral ng Pilipinas, may nga pipila n aka mga tindahan sa mga kalungsuran, ug mga panakyanan nga migamit na usab sa cashless payments.

Ang cashless payment, maayo usab sa mga turista nga dili kasagaran ganahan magbitbit og cash tungod sa kakuyaw ug kahasol nga magdala niini samtang magpabaylo o mag-ihap sa sensilyo nga dili sila suheto sa bili. (PIAbohol)

DAKU NGA IMPROVEMENT. Kon mogamit na ang kadaghanan sa mga lungsod sa cahless digital payments, nagtuo si PTC co-chair Atty Lucas Nunag nga mas makatabang, mas sayun ug mas dali na ang pagpatigayon sa mga turista nga ganahan mamalit sa mga kamerkadohan. Tumong sa Bangko Sentral ng Pilipinas nga padaghanon pa ang mga lungsod nga mosagop sa cashless payments pinaagi sa Paleng-QR PH. (PIAbohol)