Magpalista, aron makaapil sa

PCA mobile health services

TAGBILARAN CITY, Bohol (PIA)—Parehistro aron mahi-apil sa programa, kini panawagan sa Philippine Coconut Authority (PCA) ngadto sa mga mag-uuma nga nagtanum, nag-alima, og nagtrabaho sa kalubihan, aron maka-ambit sa mga serbisyo nga tanyag sa Coconut Farmers and Industry Development Program (CFIDP).

Kini maoy gipadayag ni PCA bohol Provincial Manager Jovencio Felisilda, kinsa guest sa sinemanang Kapihans a PIA.

Sa ika upat nga tuig sa pagpatuman sa gibuhian nga CFI Trust Fund o mas nailhan nga coco levy fund, wala ka mga giprograma nga tabang alang sa pagpahiuli ug paghimong kasaligan nga tinubdan sa panginabuhian ang tanyag sa PCA sa mga nagpanglubihan.

Lakip na niini ang social protection program nga naglakip sa libreng health insurance (PhilHealth), libre nga crop insurance (PCIC), ug mga scholarship para sa mga anak sa mag-uuma sa lubi pinaagi sa CHED.

Sa Social protection program lang, matud ni Felisilda nga ilang gitutokan karoin ang health ug medical assistance program diin pinaagi sa PhilHealth, nakapatagana ang PCA og tag P40,000 nga hospitalization alang sa direkatng benepisaryo sa maglulubi sulod sa tulo ka buwan, lain nga P5 mil alang sa outpatient consultation ug post admission nga galastohan.

Gani, gipalayag ni Felisilda ang Mobile Health Services sa PCA nga ilang gidala ngadto sa mga lugar nga hilit, ug mas nanginahanglan sa tabang.

Didto, mag libre nga medical consultation pinaagi sa mga mananambal nga dala sa PCA, libreng laboratory subay sa resulta sa konsulta, libre nga pagbasa sa mga resulta sa laboratory ug libreng tambal sulod sa us aka buwan alang sa labing menos 250 ka mga sakop nga mag-uuma sa PCA ug rehistrado sa proigrama.

Gawas sa medical services, aduna usab silay dental ug optal services kuyog sa nahisgutan nga mobile health services.

Gipaabut usab sa PCA nga kini nga benepisyo, mahimong magamit dungan usab sa serbisyo sa Yakap sa Philhealth diin ang PCA mao na ang mohatag sa tabang sa membro pinaagi sa direktang guarantee letter ngadto sa tambalanan nga padulngan sa pasyente nga sakop saa programa.

Ug tungod niini, prayoridad ang mga narehistro, hinungdan nga kini ang panawagan sa PCA.

Sa pagparehistro, magkinahanglan nga makigkita sa taga PCA dala ang valid ID, 2x2 picture, pruweba nga nanang-iya sa yutan nga gitamnan sa kalubihan ug sertipikasyon sa tag-iya sa yuta nga ang morehistro maoy nag-atiman, tigkopras ug nag-ugmad sa yuta. (PIABohol)

ALANG SA MAGUUMA SA LUBI. May libreng mga mobile health services ang PCA ngadto sa mga mag-uuma sa lubi nga anaa s amga hilit nga lugar, ug kadto lamang rehistrado sa programa ang makasinati niini, mao nga gipanawagan ni PCA manager Jovencio Felisilda ang mga wala pa masakop apan may kalubihan nga magparehistro sa PCA. (PIABohol)