IRR sa Marine Wildlife Inter-action:

Magkuha una og CoC, sa dili pa

magmarine wildlife inter-action

TAGBILARAN CITY, Bohol (PIA)—Walay makapasugod sa usa ka kalihukan sa turismo nga maglambigit sa kadagatan ug mga mananap niini kon walay huptan nga Certificate of Compliance gikan sa Buhatan sa gobernador.

Kini usa sa mga punto nga nalatid sa Implementing Rules and Regulations (IRR) sa Provincial Ordinance No. 2026-004 o ang sa Enhanced Sustainable Marine Wildlife Interaction Ordinance sa Bohol

Nahasukip sa Executve Order No 18 nga giluwatan ni Gobernadpor Erico Aristotle Aumentado, ang COC, kinahanglan usab nga pagmatud-an sa Bohol Provincial Environment Management Office human ang aplikante napamatud-an nga nagtamud sa Enhanced Sustainable Marine Wildlife Interaction Ordinance sa Bohol, ug sa iyang implementing rules and regulations.

Makuha lang usab ang COC human ang aplikante irekomendar sa Sustainable Wildlife Tourism Advisory Board pinaagi sa resolusyon human mahimo nila ang pagtuki kon nasubay bas a mga lagda, pagmonitor sa mga taho ug napamatud-an ang mga kasayuran nga gi-padayag.

Alang sa usa ka lungsod nga magpabukas sa Marine Wildlife Tourism Interaction Sites, gikinahanglan nga makamugna na usab og update nga Comprehensive Land Use Plan nga nag-apil sa Coastal Resource Management Plan, Coastal Zoning Ordinance ug Eco-tourism Management Plan samtang magpaseguro nga kini nga kalihukan ug mga plano, nahasubay sa Local Tourism development Plan.

Gawas pa niana, gikinahanglang ang marine wildlife interaction operators nga makakuhag Mayors o Business Permit human usab makapakita nga nahisakop sila sa pagsubay ug pagdumala sa Maritime Industry Authority (MARINA), Department of Tourism (DOT) ug uban nga mga ahensya nga nagtutok niini.

Ang lunsgod usab nga magpabukas ug magtugot sa Marine Wildlife Interaction kinahanglang may nabansay nga enforcement team nga maka-abag sa Department of Environment and Natural Resources, Philippine Coast Guard, PNP Maritime Group, BPEMO ug Bureau of Fisheries ang Aquatic Resources ug sa komunidad alang sa regular nga hiniusang operations.

Gikinahanglan usab sa operator nga may nahuptan nga sertipiko sa Marine Wildlife Interaction Guidelines, Basic Life Support, Water safety and Rescue (WASAR), Safety at Sea, DENR, BFAR, MARINA.

Importante usab nga ang operator makakuha og Environmental Compliance Certificate gikan sa DENR MGB, gawas pa sa rehistradong mga bangka, safety equipment, GPS, plano sa pagdumala sa mga turista ug insurance alang sa aksidente sa mga turista, tripulante ug mga tour guides. (PIAbohol)

DILI ABUSOHAN ANG GIPANGINABUHIAN. Tumong sa Ordinansa ug sa IRR niini nga kon may marine wildlife inter-action man nga mahitabo, kinahanglang protektado ug segurado nga walay grabeng epekto sa mga ihalas nga mananap, walay kadaut sa kalikopan ug nakasubay ang operators sa tanang mga lagda aron motunhay ang panginabuhian sa tanan. (PIABohol/TRIPS)