PBBM gilugwayan ang deadline sa pag-file

sa income tax return hangtod sa Mayo 15

TAGBILARAN CITY, Bohol (PIA)--Ang mga magbubuhis adunay dugang nga panahon sa hustong pagkompleto sa ilang pagsumite sa tanang gikinahanglan nga mga dokumento ug walay silot human gipahibalo ni Presidente Ferdinand R. Marcos Jr. niadtong Martes ang paglugway sa deadline sa pag-file alang sa 2025 Annual Income Tax Returns gikan sa Abril 15 ngadto sa Mayo 15.

Sa usa ka post sa Facebook account ni Bongbong Marcos, ang Presidente miingon nga ang deadline sa pag-file gilugwayan aron mahatagan ang mga magbubuhis og dugang nga panahon sa pag-file sa husto, lakip ang tanang gikinahanglan nga mga dokumento, nga walay mga silot o surcharges.

“Pinalawig natin ang deadline ng filing ng 2025 Annual Income Tax Returns mula April 15 hanggang May 15, 2026. Mas may oras ang bawat taxpayer na makapag-file nang maayos, kasama ang lahat ng kailangang dokumento, at walang ipapataw na penalties,” matud pa sa iyang post.

Ang mga magbubuhis mahimong mag-file ug mobayad pinaagi sa electronic platforms sa Bureau of Internal Revenue (BIR) o pinaagi sa Authorized Agent Banks.

Matud pa ni Marcos nga iyang gimando ang usa ka bulan nga lugway aron mapagaan ang palas-anon sa mga magbubuhis samtang ang nasud nag-atubang sa mga epekto sa panagbangi sa Middle East.

Gipasiugda sa iyang post nga ang mga paningkamot sa gobyerno nagpadayon sa pagpagaan sa palas-anon sa mga Pilipino sa ilang adlaw-adlaw nga kinabuhi, nga nagpahayag nga ang mga inisyatibo nagpadayon sa pagtabang sa pagsulbad sa mga hagit nga giatubang sa publiko. (ECB/PIA7-Bohol)

Maayong balita! Gipahibalo ni Presidente Ferdinand R. Marcos Jr. niadtong Abril 14, 2026, ang paglugway sa deadline alang sa 2025 Annual Income Tax Returns. (PIA)