SP mangita’g paagi nga makatabang

sa nahulga nga woodworks industry

TAGBILARAN CITY, Bohol (PIA)—Gisugyot ngadto sa Sangguniang Panlalawigan ang pahhimo og mga lakang aron tun-an ug tuki-on ang posible nga pagkapilde sa kapin sa 200 ka mga wood furniture shops, kinsa mahimong multahan ug sirad-an ang ilang mga negosyo tungod sa ka-walay mga permits, compliance certificates ug plant processing permits.

Si Board Member Jiselle Rae Villamor, mingbarug atubangan sa SP dihang iyang nasayran gikan sa Bohol Island State University Technology Business Incubator nga nakadawat nag notices of violations and mga wood furniture makers.

Ang mga notices gikan sa Department of Environment and Natural Resources (DENR), tungod sa kapakyas sa mga furniture workshops sa pagkuha sa Environmental Compliance Certificate ug Wood Processing Plant Permit sa ilang mga negosyo.

Matud ni Bokal Villamor nga daghan sa mga wood furniture makers ang wala masayud niining mga requirements, ug nagtuo nga ang permits nga gikan sa mayor ug pagparehistro sa Bureau of Internal Revenue aron makapangresibo, igo na.

Sa notices of violations, mahimo nga masirad-ana ng ilang mga negosyo, dili tungod sa kawalay kaikag nga motuman, apan sa kalisud sa pagsubay sa teknikal ug mahal nga proseso sa pagcomply sa mga rekisitos.

Samtang gipatin-aw sa babayeng magbabalaod ang gikinahanglang pagrespeto sa mga balaod sa kalikopan alang sa malungtarong pagdumala sa kahinguhaan, nahingawa usab siya sa dangatan unya sa mga gagmay nga negosyo.

Tungod niini, gisugyot ni Villamor ang pagtuon sa hisgutanan agi og pag-abag sa pagpamanday sa balaod, ug buot niya nga mahilakip sa paghisgut ang DENR, DTI, ang mga local nga kagamhanan ug mga stakeholders sa industriya sa woodworks.

Kini aron tumbokon diin ang mga kakuwang sa kasayuran ug pagpatuman sa balaod, tuki-on ang mga pamaagi pagtabang sa kagamhanan aron mapatuman ang mga rekisitos ug pag-ugmad og mga polisiya nga ikabalanse ang pagpanalipod sa kalikopan ug ang ekonomikanhong paglahutay.

Ang hisgutanan karon, ipatuki sa hiniusang SP committee on Environment ug Trade and Industry. (PIAbohol)

KALISUD PANAHON SA KALISUD. Mingbarug si BM Jiselle Rae Villamor aron ipakayab ang suliran sa mga wood craft makers ug wood furniture industry, nga mahimong kamultahan sa pag-padagan sa ilang negosyo nga wala’y ECC ug walay permits sa ilang mga planta, butang nga gituohan sa magbabalaod nga wala masayri sa mga negosyante nga kinahanglan pa diay kuhaon. (PIABohol/BM Villamor)