DND nagmugna og bag-ong pension system alang sa mga sundalo ANG Department of National Defense (DND) ug ang Armed Forces of the Philippines (AFP) nagmugna karon og bag-ong polisiya ug sistema sa paghatag sa retirement ug separation benefits alang sa mga sundalo. Ang Kalihim sa DND nga si Voltaire Gazmin niingon nga ang bag-ong sistema i-ilis sa AFP-Retirement and Separation Benefit System (AFP-RSBS) nga wagtangon na tungod sa mga suliran nga giatubang niini nga gipadangat sa mga retired military personnel. Matud pa ni Gazmin nga iyang gimanduan ang RSBS pinaagi sa opisina sa AFP chief-of-staff ug chairman of the board of trustees nga si General Ricardo David sa paghimo og pagtuon niini.   Ang AFP-RSBS natukod niadtong tuig 1973 aron e-take over gikan sa nasudnong kagamhanan ang pagsuporta sa pension requirements sa mga AFP retirees, human sa 25 ka tuig.  Aduna kini inisyal nga pundong P200 milyon gikan sa national treasury.   Gikan sa tinguha niini nga self-sufficiency, nigawas hinuon nga ang kagamhanan padayong nagpagawas og salapi aron pag-abaga sa retirement expenses alang sa mga retired military personnel.   Mao kini ang nakapa-aghat  kang kanhi Presidente Gloria Macapagal-Arroyo, pinaagi sa rekomendasyon ni kanhi Defense Secretary Gilberto Teodoro  Jr. sa pagpagawas sa Executive Order No. 590 niadtong tuig 2006 nga nagmandu sa pagwagtang sa RSBS.  (PIA)   10 posibleng mag-atubang og kaso sa nahitabong hostage crisis   NAKITA sa Incident Investigation and Review Committee (IIRC), ang special panel nga naghimo'g imbestigasyon sa nahitabong hostage crisis sa Manila niadtong Agosto 23, nga 10 ka tawo apil na sa mga opisyal sa kapolisan, opisyal sa gobyerno ug media ang posibleng responsible sa dugoong gidangatan sa 11-ka oras nga hostage crisis.   Si Justice Secretary Leila de Lima, chair sa IIRC, niingon niadtong Huwebes nga i-apil sa panel ang pagsubmitir sa comprehensive report ngadto kang Presidente Aquino ang rekomendasyon nga pagpasaka og kaso batok sa mga indibidwal nga nahilambigit sa paggunit sa hostage crisis.   Wala hinuon gihinganlan ni De Lima ang mga responsible og nagkanayon nga ang Presidente na ang mohingan niini sa publiko.   Hinuon, gipasabot ni De Lima nga depende na sa Presidente kon iyang aprobahan o dili ang mga rekomendasyon sa IIRC.  (PIA)