Malacañang misalikway sa katahap sa resulta sa IRRC report   GISALIKWAY sa Malacañang ang mga pagduda ug alegasyong nga adunay mahitabong 'whitewash' sa opisyal nga report sa Incident Investigation and Review Committee (IIRC) kabahin sa nahitabong hostage taking niadtong milabay'ng Agosto 23.   Ang pagduda mitumaw human ipahibalo sa Palasyo nga unya na kini ipublikar inig abot ni Presidente Benigno "Noynoy" Aquino III gikan sa Estados Unidos.   Gipahibalo usab nga hatagan una og kopya sa IIRC report ang kagamhanan sa Hong Kong ug China una pa mapublikar sa Pilipinas ang maong impormasyon.   Ang 83 ka pahinang report gikatakda na untang ipagawas sa publiko kagahapon apan tungod sa giingong pagpadala una og kopya niini sa China ug Hong Kong isip kortesiya, wala na kini mahinayon.   Gibutyag ni Kalihim Ricky Carandang nga posibleng si Justice Secretary Leila de Lima ug dili na si Presidente Aquino ang mopagawas niini ngadto sa publiko.   Sa nahiunang nanggawas nga tahu, giingong adunay 12 ka personahe ang hayan pasakaan og kasong administratiba ug kriminal nga naglakip sa usa ka lokal nga opisyal, usa ka tigbalita ug ang uban mga polis.   Niadtong Agosto 23, gi-hostage sa gi-dismissed nga  polis nga si Rolando Mendoza ang usa ka bus.  Atol sa negosasyon, nasuko si Mendoza dihang gisikop og apil sa mga kapolisan ang iyang igsuon hinungdan nga gitagsa-tagsa niini pagpusil ang mga turistang Intsik gikan Hong Kong.  Walo kanila ang namatay apan napatay usab si Mendoza.  (PIA)   Kasundalohan, kapolisan mopatuman og Security Operations alang sa umaabot nga eleksyon   ANG Armed Forces of the Philippines (AFP) mo reactivate sa ilang Task Force-Honest, Orderly and Peaceful Elections (HOPE) agig pagpatuman sa ilang election-related duties sa nagsingabot nga Barangay eleksyon sa sunod buwan.   Niadtong Domingo, ang tigpamaba sa AFP nga si Brig. Gen. Jose Mabanta niingon nga ang task force mopatuman sa ilang mga katungdanan sama sa ilang gihimo niadtong milabay'ng presidential ug lokal nga eleksyon diin ang maong task force, ug ang militar sa kinatibuk-an, maayo og nahimo.   Ang hiniusang pwersa sa militar ug kapolisan sa milabay'ng eleksyon nakapaseguro sa hapsay ug malinawon nga resulta tungod sa paghimo nila og security operations batok sa mga armadong grupo nga naghulga sa hapsay ug malinawon nga eleksyon.  Ang mga kasundalohan uban sa kapolisan ang nagbantay sa pagdala sa mga election paraphernalia.   Wala pa hinuon gibutyag ni Mabanta kon kanus-a gyud e-reactivate ang maong task force ug ni dugang nga bag-uhay lamang sila nipahigayon og coordination meeting kauban sa  Commission on Elections sa milabay'ng Biyernes.   Ang pagpangampanya alang sa barangay eleksyon magsugod sa Oktubre 14 ug matapos sa Oktubre 23 apan ang pagpatuman sa gun ban sa AFP ug Philippine National Police magsugod karong Setyembre 25.  Ang aktwal nga barangay eleksyon ipahigayon sa Oktubre 25.   Ang PNP planong mopatuman sa 45 ka adlaw nga nationwide security operations alang sa umaabot nga barangay elekyon.  (PIA)