Puno, Verzosa ug uban pang lokal nga opisyal gilambigit sa jueteng   GILAMBIGIT silang Interior and Local Government Undersecretary Rico Puno ug retired police chief Jesus Verzosa uban sa mga incumbent ug kanhi mga opisyal sa gobyerno nga matud pa nagdawat og kwarta gikan sa mga jueteng operators.   Si Retired archbishop Oscar Cruz nihingan sa duha ug walo pa – apil ni Pampanga Gov. Lilia Pineda – kinsa ang pinakadakung tigdawat sa operasyon sa jueteng sa nasud atol sa joint hearing sa Senate committees on Blue Ribbon, local government and on rules niadtong Martes.   Silang Puno ug Verzosa ang gihinganlang "ultimate recipients" sa listahan.   Sa maong hearing, gibutyag usab ni Cruz nga ang negosyanteng ig-agaw sa Presidente nga  si Tonyboy Cojuangco, nisulay pagkombinsir nga maghinay siya sa iyang exposé ni Puno.   Si Blue Ribbon chairman Teofisto Guingona III ang nibasa sa mga ngalan sa listahan ni Cruz.   Si Puno, kinsa nitambong atol sa maong hearing, nihimakak sa mga pasangil ni Cruz. Si Verzosa mihimakak usab sa maong pasangil pinaagi sa iyang abogado.   Giapil usab sa listahan ni Cruz silang Paul Dy sa Isabela; retired general Eugene Martin sa Baguio City; Mayor Mauricio Domogan sa Baguio City; Danny Soriano sa Cagayan; usa ka  retired 'General Padilla' nga nag operate sa Pasay, Parañaque, Muntinlupa, ug San Pedro; Gov. Amado Espino sa Pangasinan, ug Boy Jalandoni sa Bacolod.   Giila nga jueteng "collector on the ground" ang usa ka Eddie Fontanilla, samtang usa ka  retired general Rey Cachuela ang nalista isip  "intermediate recipient."    Giila usab isip "good resource persons" sa listahan silang Atong Ang alang sa jueteng ug jai alai ug si Manuel Morato sa STL.  (PIA-Bohol)   Puno moluwat sa pangatungdanan inig abot ni Aquino   HUMAN nalambigit sa duha ka dagkong mga kontobersiya — ang jueteng ug ang resulta sa incident investigation and review committee (IIRC) — si Interior Undersecretary Rico Puno moduso sa iyang  courtesy resignation inig abot ni Presidente Benigno Aquino III gikan sa Estados Unidos.   Sa usa ka press conference sa Camp Crame sa Quezon City niadtong Miyerkoles sa buntag, si Puno niingon nga iyang iduso ang iyang courtesy resignation human sa pag-abot ni  Aquino sa Pilipinas sa Setyembre 28.   Si Aquino tua sa Estados Unidos aron pagtambong sa United Nations convention, mamulong sa UN General Assembly, ug makig-kita ni UN Secretary General Ban Ki-Moon.   Si Puno ug si retired Philippine National Police chief Director General Jesus Verzosa gi apil ni kanhi Lingayen-Dagupan Archbishop Oscar Cruz atol sa Senate inquiry niadtong Martes nga matud pa nagdawatan og kwarta gikan sa illegal numbers game nga jueteng.   Parehong gihimakak nilang Verzosa ug Puno ang maong pasangil.  (PIA-Bohol)