Aquino gidapit sa Vietnam, China   SA ika-duhang adlaw nga official business ni Presidente Benigno Aquino III sa Estados Unidos, gidapit siya pagbisita sa duha ka nasud – sa Vietnam ug China.   Si Aquino nakigtagbo na ni Vietnamese President Nguyen Minh Triet, kinsa opisyal nga nidapit kang Aquino alang sa usa ka state visit sa nasud sa Vietnam sa dili pa kini motambong sa ASEAN Summit sa Hanoi gikan Oktubre 28 hangtud 30.   Adunay upat ka agreements ang gipaabot nga pirmahan ni Aquino sa iyang pagbisita sa Vietnam aron mag institutionalize sa bilateral cooperation sa higher education, defense, ug maritime affairs.   Si Foreign Affairs Secretary Alberto Romulo niingon usab nga adunay mga representante gikan China ang nipadangat usab sa ilang imbitasyon kang Aquino sa pagbisita sa ilang nasud.   Sa wala pa mogikan si Aquino padung Estados Unidos, ang iyang mga opisyal nihatag na sa final report sa Incident Investigation and Review Committee (IIRC) kabahin sa nahitabong hostage taking niadtong Agosto 23 diin walo ka turistang gikan Hong Kong ang namatay ug pito ang nanga-angol nga maoy hinungdan nga naka-apekto sa Philippine-China nga relasyon.  (PIA-Bohol)   Puno i-apil pag imbestiga sa DILG kalabot sa jueteng — Palasyo   ANG Malacañang niadtong Miyerkoles niingon nga ang giingong pagkalambigit ni Department of Interior and Local Government (DILG) undersecretary Rico Puno sa operasyon sa jueteng i-apil sa nagpadayong imbestigasyon nga gihimo karon sa DILG ni secretary Jesse Robredo.   Si Deputy presidential spokesperson Abigail Valte nipasalig sa publiko nga walay mahitabong 'whitewash' sa imbistigasyon ni Puno, kinsa suod nga higala ni Presidente Benigno Aquino III.   Si Robredo naghimo na karon og komprehensibong plano aron pag lig-on sa kampanya sa kagamhanan batok sa jueteng.   Si Puno apil sa mga personahe nga gipasanginlang nagdawat og binuwan nga suhol nga mokabat sa minilyon ka pesos gikan sa mga jueteng operators. Ang maong mga pasangil gikan nilang retired Lingayen-Dagupan Archbishop Oscar Cruz ug Sen. Miriam Defensor-Santiago.   Gihimakak ni Puno ang maong mga pasangil apan giangkon niya nga adunay mga jueteng operators nga nisulay pagduol kaniya sa niagi.  (PIA-Bohol)