Korean gov't, nihatag og P8-M nga hinabang sa mga biktima sa linog TAGBILARAN CITY, Bohol, Feb. 17 (PIA)--Nagpadala ang Korean government og $200,000 o halos P8 milyong kantidad sa relief goods sa kagamhanan alang sa mga biktima sa magniute 6.9 nga linog sa Negros Oriental. Gipaagi sa kagamhanan sa Korea ang maong hinabang sa buhatan sa Department of Social Welfare and Development (DSWD) nga nagbutang na usab sa ilang relief operation centers sa Negros Oriental.  Sa usa ka radio interview kang DSWD Secretary Dinky Soliman, gibutyag niini nga  nakapuwesto ang mga relief operation center sa Guihulngan City ug sa Macias Sports Complex sa Dumaguete City.   Apil sa Dumaguete relief operation center ang pagpanghatag og relief goods sa mga residente sa Manjuyod, Bindoy ug Ayungon.   Samtang ang Guihulngan relief operation center ang manghatag sa mga apektadong pamilya nga naa sa Guihulngan, La Libertad, Jimalalud ug Tayasan.    Gitataw sa DSWD nga magpadayon pa ang pagpanghatag og relief goods sa mga apektadong pamilya bisan gitakda nang undangon karong adlawa ang search and retrieval operations sa 66 pang nangawala sa lalawigan.   Ganinang buntag, gibutyag ni Office of Civil Defense (OCD) Region 7 Director Minda Morante nga nisaka na sa 50 ang gidaghanon sa mga nangamatay sa linog sa Negros Oriental. (PIA-Bohol/ecb)  _________________________ Mga ginikanan, gi-aghat sa DepEd pagreklamo kalabot sa graduation fees TAGBILARAN CITY, Bohol, Feb. 17 (PIA)--Gi-aghat sa Department of Education (DepEd) ang mga ginikanan sa pagreklamo kun adunay maningil alang sa graduation fees o bisan unsang kontribusyon kalabot sa graduation sa mga pampublikong tunghaan.   Sa pakighinabi sa radyo kang DepEd Assistant Secretary Tonisito Umali, miingon kini nga mahimong motawag sa hotline number sa nasudnong buhatan nga 636-16-63 ang mga ginikanan nga gustong mopadangat sa ilang reklamo.   Hingpit nga gibarugan sa buhatan ang pagbawal sa pagkolekta og graduation fees sa mga magtutudlo, mga principal ug bisan kinsang kawani sa DepEd sa bisan unsang graduation fees o kontribusyon   Apan gitataw sa DepEd nga kun ang mga ginikanan o ang Parents-Teachers Association (PTA) ang magkauyon kabahin sa graduation fees o kontribusyon, paga-ilhon kini sa buhatan apan angay lamang nga boluntaryo, dili pugson ug dili mahimong gamiton ang mga magtutudlo, principal o bisan kinsang kawani sa DepEd sa pagpangolekta.  (PIA-Bohol/ecb)