Chatto mihangyo’g hinabang sa mga Bol-anon alang sa NegOr

By Rey Anthony H. Chiu

TAGBILARAN CITY, Bohol, Febrero 17 (PIA)-- Human makatigum og dul-an sa P3M nga ihinabang alang sa mga nabiktima sa mga katagaman nga dala sa bagyong Sendong, giaghat na usab ni Gobernador Edgar Chatto ang mga Bol-anon sa pagtabang na usab sa mga nabiktima sa linug didto sa Negros Oriental. 

Sa iyang pagtaho sa mga nabuhat sa kagamhanang probinsyal, ilabi na sa tabang niini ngadto sa mga igsoong Pilipino nga na-igo sa katalagaman sa Cagayan de Oro, Iligan, Misamis Oriental ug Dumaguete, gipadayag ni Chatto nga giduso nila ang tabang ngadto sa Negros Oriental ilabi na sa Sibulan ug Valencia niadtong Enero 24, segun usab sa sertipikasyon ni Provincial Treasurer Eustaquio Socorin. 

Alang sa Negros Oriental, mihatag ang Bohol sa P300T ug gitugbangan usab kini sa mga local government units aron mokabat sa P526Tang kinatibuk-ang tabang. 

Mitampo alang sa Negros ang Guindulman nga P50T, Dauis ug Garcia Hernandez P30K matag usa; Calape, Jagna ug Valencia mihatag og P20K matag usa; Sevilla P16T; Alburquerque, Balilihan, San Miguel ug Tubigon P10K matag usa. 

Misanong usab ang mga Bol-anon sa panawagan sa tabang alang sa Cagayan de Oro nga gi-unhan sa Panglao nga P100T, Dauis P60T, Batuan, Guindulman, Trinidad tag P50K matag usa; Jagna P40T, Valencia ug Garcia Hernandez P30K matag usa, Antequera ug Sagbayan P25T matag usa, Alburquerque, Balilihan, Calape, Mabini, Talibon ug Tubigon P20T matag usa), Sevilla P18T, Clarin, San Isidro ug San Miguel P10K matag usa, subay sa taho ni Socorin. 

Niini, ang lalawigan sa Bohol mitunol usab sa P600 mil. 

Alang sa Cagayan de Oro, ang Bohol mipahat og P600K, ug gipun-an sa Panglao P100T), Dauis P60T, Batuan, Guindulman, Jagna ug Trinidad tag P50Tmatag usa, Valencia P40T, Garcia Hernandez ug Mabini P30T matag usa, Antequera and Sagbayan P25Tmatag usa, Alburquerque, Alicia, Balilihan, Bilar, Calape, Sevilla ug Tubigon P20T matag usa), Clarin, San Isidro ug San Miguel P10Tmatag usa lakip na ang Baclayon. 

May mga cash donations usab gikan sa Batuan P2,800; DepEd Bien Unido P11,300; Mabini P5K ug Sevilla P430 nga mi-totaled sa hinabang sa Cagayan de Oro ngadto sa P1,301, 530.00. 

Sa laing bahin, ang Jagna mitabang sa Opol Misamis Oriental pinaagi sa gitunol nga P20T. 

Gitunol ni Gob. Chatto ang P1.3 milyon nga hinabang ngadto sa Cagayan de Oro ug P1.2 milyon usab nagdto sa Iligan City niadtong Pebrero 6. 

Niadto usab nga adlaw, laing trahedya ang mipakurog sa Kabisay-an pinaagi sa linug nga mitala sa magnitude 6.9. 

Tungod niadto, may mga kabalayan sa Tayasan ug Guihulngan ang natabunan sa midahile nga bukid nga nagpalubong usab sa duolan sa usa ka gatus ka tawo. 

Sa tataw nga kakuwang sa kagamitan, sapot ug ekipo ilabi na ang sa pagkaon, nanghinaut si Chatto nga sama sa nahauna, mosanong gihapon ang mga Bol-anong may malumo nga kasingkasing aron pagtabang. (mbcn/rahc/PIA-Bohol)