Tanang sitio sa Bohol 

Lukpon na og pasuga 

Rey Anthony H. Chiu 

TAGBILARAN CITY, Bohol, Pebrero 17, 2012 (PIA) – Lukpon og kutay sa mga linya sa koryente ang tanang sitio sa Bohol sa sunod tuig. 

Kini samtang nakuha ni Gobernador Edgar Chatto ang pasalig ni Presidente Benigno Simeon Aquino III nga pundohan ang pagpakatap sa sugang dagitab sa matag suok sa Bohol, butyag sa gobernador didto sa iyang State of the Province Address atubangan sa mga bokal ug mga dinapit nga sector dinhi. 

Karong tuiga, 162 ka sitio nga anaa sa ikaduha ug ikatulo nga distrito ang abton sa kutay sa sugang dagitab, samtang laing 109 ka mga sitio ang sudlon sa koryente sa 2013, butyag sa gobernador sa iyang pakigpulong sulod sa Sangguniang Panlalawigan Session Hall Pebrero 17. 

Gani, alang sa unang distrito sa Bohol, ipatuman usab ang Share a light program sa Bohol Electric Cooperative, sumpay ni Chatto. 

Ning mga higayona, gimanduan na sa National Electrification Administration Administrator Edith Bueno si BOHECO II general manager Carlos Itable sa pagsubmitir sa mga gikinahanglan aron matibawas ang proyekto sa dili pa ang Pebrero 24, aron mapadali usab ang pagpatuman niini nga gilantaw nga sugdan sa dili pa motapus sa Marso. 

Daan na nga lakip sa mga nag-una nga lalawigan nga nakakompleto sa 100% nga pagpakutay sa koryente sa mga kalungsuran niini, gitumong na usab sa Bohol nga sudlon ang matag suok sa Bohol subay sa inclusive growth nga panglantaw sa administrasyon. 

Ang pagbaton sa suga dako ug ikatampo alang sa mas produktibo nga kinabuhi sa katawhan kinsa makahimo na sa dugang gimbuhaton ng di sarang mahimo kon walay kasaligang iwag. 

Matud usab ni Chatto, kini wala pa magkwenta sa tabang nga ikahatag niini ngadto sa mga kabataan nga manggituon sa kagabhi-on ilawom na sad an-ag nga tinubdan sa sugang dagitab inay sa iwag sa lamparilya. 

Ang 100% Energization Project sa Bohol usa sa mga component sa pagseguro nga ang mga tunghaan usab mapakutay sa internet aron kahatagan ang mga kabataan sa tukmang teknolohiya aron mo-ambas sa global competition. 

Hinuon, matud ni Chatto, sama sa naandan, dili lamang pundo gikan sa president ang saligan sa Bohol alang niini. 

Usa ka eskema sa counterparting ang gipatuman sa Bohol karon aron ang dyutay nga pundo sa local nga kagamhanan korambusan sa laing mga tinubdan. (30) 

=========

Bohol mitala og P1.3B sa 

mga bag-ong negosyo sa 2011 

By Rey Anthony H. Chiu 

TAGBILARAN CITY, Bohol, Pebrero 18 (PIA) -- Bohol Gobernador Edgar Chatto sa iyang 'State of the Province Address' mireport nga aduna’y P1.3B nga investments ang nisulod sa probinsiya sa Bohol sa 2011 nga nagagikan sa 2,197 ka mga bag-ong negosyo. 

Gisaysay ni Chatto sa atubangan sa mga sakop sa Hunta Probinsyal nga ang pagpahigayon sa usa ka sayon nga business environment mahimong maoy labing dakong rason sa kadaugan sa ekonomiya sa Bohol. 

Gitumbok niya nga ang katukoran sa Bohol Business One Stop-Shop (BOSS) nga maoy labing mahinungdanong nahimo sa panagtambayayong sa pribadong sector ug sa kagamhanan sa pagpahiluna sa maayong kahigayonan sa negosyo. 

Ang BOSS usa ka inisyatiba diin gitapok ilawom sa usa ka buhatan ang mga tinugyanan nga may kalambigitan sa pagpasugod sa legal nga pagnegosyo sa usa lamang ka lugar aron mas mapasayon ug mapadali ang pag-pahuman sa mga papeles. 

Matud pa sa DTI, kaniadto daghan pa untang mga negosyanteng motukod ug negosyo apan tungod sa kahasol sa pagparehistro ug pagproseso sa ilang mga dokumento, mopili na lang sila nga dili magparestro. 

Apan tungod sa pagtukod sa BOSS ang mga bag-ong negosyo nga natukod sa 2011 milapas na sa atong gilaumang abton, matud ni Chatto. 

Sigun sa datus nga natala sa BOSS nga anaa mahimutang sa Bohol Investment Promotion Center (BIPC) ang P1.3 bilyones gikan sa 2,197 ka mga bag-ong negosyo, 64% nga usbaw sa gidaghanon kon itandi kini sa mga negosyong natukod niadtong 2010. 

Dugang pa sa gobernador, namatikdan usab sa BIPC nga mas daghan karong ang mga babayeng nagnegosyo ug kini mikabat ngadto sa 52% sa kinatibuk-ang gidaghanon sa mga bag-ong pamuhunan sa probinsiya. 

Gibungat usab sa gobernador nga iyang giaghat ang laing 21 ka lungsod sa Bohol nga ipahimutang na usab angBusiness Process and Licensing Systems (BPLS) nga magpadali sa serbisyo sa mga bag-ong negosyante. 

Kasamtanang 26 sa 47 ka lungsod pa lamang ang dunay napahimutang nga BPLS. (mbcn/rahc/PIA-Bohol)