PNoy, nimando na sa pagpangapud-apod sa P1,200 nga 'Pantawid Pasada' TAGBILARAN CITY, Bohol, Feb. 20 (PIA)--Gimando karon ni Presidente Benigno "Noynoy" Aquino III ang reloading sa P1,200 nga smart cards sa mga benepisyaryo sa Pantawid Pasada Program sa gobyerno. Naa sa 100,000 ka drivers/operators sa pampasaherong dyip ang makapahimos niining maong programa aron makuhaan ang sunod-sunod nga pagsaka sa presyo sa produktong petrolyo.   Matud pa ni Presidential Spokesman Edwin Lacierda, naa sa P200 million ang gigahin sa  gobyerno alang sa maong programa nga pangunahan sa Department of Energy (DoE).   Dugang pa ni Lacierda, gipaabot usab ang diskuwento sa presyo sa mga spare parts sama sa baterya ug ligid kun mahuman na ang kasabotan sa mga kooperatiba ug manufacturers.   Sa pagkakaron, dili pa makahatag og kompirmasyon si Lacierda kun padayon pa ba ang dialogue sa Presidente ug transport groups nga una nang gipahibalo mismo sa chief executive.   Giingong ang mahinungdanon, gihimoan sa gobyerno og paagi aron masolbad ang problema sa mga naa sa transport sector. (PIA-Bohol/ecb) ___________________________ Environmental Performance Index sa Pilipinas, misaka TAGBILARAN CITY, Bohol, Feb. 20 (PIA)--Naapsan sa Pilipinas ang mga nasud nga  Australia ug Amerika sa Environmental Performance Index (EPI).   Ubos sa strong performer category sa EPI nga giandam sa Yale ug Columbia Universities, misaka sa rank 42 ang Pilipinas samtang naa sa rank 48 ang Australia, Amerika sa 49, Singapore sa 52 ug Bulgaria sa 53.   Naumol ang EPI human sa World Economic Forum sa Geneva, Switzerland ug Joint Research Center of the European Commission sa Italy.   Tuyo niini nga ilhon ang mga programa sa matag nasud kalabot sa pag-alima sa kalikopan.   Matud pa ni Environment Secretary Ramon Paje, apil sa mga indicators nga giila ang mga programa sa gobyerno batok sa hugaw nga hangin ug pagkadaot sa kalasangan.    Kahinumdoman nga naa sa ika-50 ang ranggo sa nasud sa miaging tuig. (PIA-Bohol/ecb) ____________________________   Blessed Pedro Calungsod, ideklarar na nga ika-2 Pilipinong Santo sa Oktubre   TAGBILARAN CITY, Bohol, Feb. 20 (PIA)--Opisyal nang gi-anunsyo sa Simbahang Katoliko ang kanonisasyon ni Blessed Pedro Calungsod karong Oktubre.   Kini nagpasabot nga si Beato Calungsod na ang mahimong ika-duha nga Pilipinong santo nga giila sa simbahan, sunod kang San Lorenzo Ruiz.   Tungod niini, daghan nang mga deboto sa Archdiocese Shrine of Pedro Calungsod sa Cebu ang nidagsa aron i-agi ang ilang mga pag-ampo ug pasalamat.   Gikalipay usab sa mga Cebuano ang balita ilabi na nga gitakdang pagatawagon ang Beato isip San Pedro de Cebu sa higayon nga mahimo na siyang santo.   12 ka tuig na ang niagi sa dihang nahimong Beato si Calungsod apan sa niaging tuig lang gi-endorso sa Congregation for the Causes of Saints sa Rome, Italy ang kanonisasyon niini sa Santo Papa.   Sugdan na ang pagpangandam sa Simbahang Katoliko sa Pilipinas aron isaulog ang pagkahimo sa bag-ong santo sa simbahan. (PIA-Bohol/ecb)