11% pagkunhod sa krimen sa unang buwan ning tuig; Kawat, tulis nag-unang krimen TAGBILARAN CITY, Bohol, Feb. 22 (PIA)--Mikunhod ngadto na sa 11 porsyento ang gidaghanon sa mga krimen sa unang buwan niining tuiga kun itandi sa susamang panahon sa niaging tuig diin ang kawat ug tulis ang nag-una. Mao kini ang gibutyag ni PSSupt. Constantino Barot Jr. atol sa tigum sa Provincial Peace and Order Council (PPOC) kagahapon nga gipahigayon didto sa Governor's Mansion ning dakbayan sa Tagbilaran. Sigun pa kang Barot, natala sa Bohol Police Provincial Office (BPPO) ang 246 ka hitabo sa miaging buwan ug nikunhod kini sa 11 porsyento kun itandi sa 278 ka mga kaso sa Enero niadtong miaging tuig. Nag-una gihapon ang kaso sa pagpangawat nga nitala og 105 o 51 porsyento, gisundan kini sa tulis nga nitala og 52 mga kaso o 25 porsyento, ug physical injuries nga 28 ka mga kaso o 14 porsyento.  Matud pa nga nagsunod ang Bohol sa nasudnong panghitabo diin ang kaso sa kawat, tulis ug physical injuries maoy nag-una. Natala usab sa kapolisan ang 7 ka kaso sa karnapping, 6 sa murder, 6 ang homicide ug 1 ang rape sa miaging buwan. Ang index crimes nga 212 mikunhod ngadto na lamang sa 205 ug ang mga non-index crimes nga 66 mikunhod ngadto sa 41. Si Barot miingon nga ang pagkunhod sa krimen gumikan sa pagpatuman sa Police Integrated Patrol System (PIPS) apil na ang mga gipahigayon nga checkpoints ug mga foot patrol. Si Gob. Edgar Chatto kinsa mao ang nangulo sa maong tigum sa PPOC ug nisaulog usab sa iyang adlaw'ng natawhan kagahapon, mipahalipay sa paningkamot sa kapolisan sa atong lalawigan sa pagkunhod sa krimen ug miila sa taho ni Barot nga maoy labing maayong gasa sa iyang pagsaulog sa adlaw'ng natawhan gikan sa kapolisan. Dugang pa ni Chatto nga ang kagamhanan sa atong lalawigan nagpadayon sa pagtagad sa suliran sa kakabus aron makunhoran ang mga hitabo sa krimen bisan dunay uban nga mga hinungdan sama sa pangisip sa mga gikatahapan. (PIA-Bohol/ecb) _____________________________ Semi-Legal Teams, napakgang ang pagsulod sa Bohol TAGBILARAN CITY, Bohol, Feb. 22 (PIA)--Pinaagi sa mga proactive measures nga gipatuman sa mga local government units gikan sa barangay ngadto na sa probinsiyal nga han-ay ug uban pang mga kaalayon, napakgang sa pagsulay pagsulod ang mga Semi-Legal Teams (SLTs) sa mga teroristang komunista sa pagtukod pagbalik sa mga local nilang mga contacts sa mga dapit nga ilang nadani kaniadto. Mao kini ang gitaho ni Col. John Bonafos, ang Commander sa 802nd Infantry Brigade sa Philippine Army dinhi sa Bohol atol sa tigum kagahapon sa Provincial Peace and Order Council (PPOC) nga gipahigayon didto sa Governor's Mansion ning dakbayan. Apil sa mga umaabot nga plano sa mga militar mao ang pagpadayon sa pagpadala sa mga Prosperity Teams (ProTeams) ngadto sa mga barangay ug pagpahigayon sa Countryside Development Programs nga Purok Power Movement (CDP-PPM) alang sa kalinaw ug kaugmaran sa atong lalawigan. Gibutyag ni Col. Bonafos nga ang provincial party committee natukod aron sa pagmando ug pagpugong sa mga armed ug white struggles. Ang Provincial Public Safety Company (PPSC) sa Bohol Police Provincial Office (BPPO) mihimo og hiniusang operasyon kauban sa 802nd IB niadtong Enero 21 hangtud 24 sa mga target areas sama sa mga lungsod sa Batuan, Balilihan, Danao, Talibon, Getafe, Dimiao, Bilar, Catigbian, Buenavista, Trinidad, Sagbayan ug apil na usab sa mga ProTeams nga naghimo sa mga peace and development operations. (PIA-Bohol/ecb)  ___________________________________  10 min. lang ang paaboton sa paglukat og NBI clearance dinhi  TAGBILARAN CITY, Bohol, Feb. 22 (PIA)--Sulod lamang sa 10 minutos, makuha na sa mga Bol-anon ang ilang National Bureau of Investigation (NBI) clearance. Mao kini ang gibutyag ni NBI Regional Director Ed Villarta atol sa pagtugyan sa bag-ong biometric machine ug uban pang mga kahimanan sa kagamhanang probinsyal nga gipangunahan ni Gob. Edgar Chatto kagahapon atol sa tigum sa Provincial Peace and Order Council (PPOC) nga gipahigayon didto sa Governor's Mansion ning dakbayan. Sa pagtugyan niining mga bag-ong kahimanan, 10 minutos na lamang ang paaboton sa paglukat sa NBI clearance. Gitaud dayon kagahapon sa mga kawani sa NBI ang software human madawat ang maong mga kahimanan ug magamit na kini sugod karong adlawa. Kinahanglan lamang nga magdala og valid identification card o ID ang gustong molukat og NBI clearance didto sa buhatan sa NBI nga nahimutang sa Annex Building sa Provincial Capitol subay sa dalan J.A. Clarin sa Dao District ning dakbayan. (PIA-Bohol/ecb)