Mga kawani sa gobyerno, maka-avail na og 5-day special calamity leave  TAGBILARAN CITY, Bohol, Feb. 23 (PIA)--Mahimo nang maka-avail og lima ka adlaw nga special emergency leave ang mga kawani sa gobyerno nga direktang maapektuhan sa kalamidad.   Nakalatid kini sa resolusyong gipagawas sa Civil Service Commission (CSC) tungod na usab sa kanunay nga pag-igo sa kalamidad sa nasud.   "With the increasing risks brought about by climate change and global warming, the Commission saw it necessary to offer assistance to state workers affected by natural calamities in the form of special leave. We hope that this would give affected employees respite and ample time to recover," matud pa ni CSC Chair Francisco Duque III.   Base sa CSC Resolution No. 1200289 nga gipagawas niadtong Pebrero 8, ang mga kawani sa gobyerno nga nagpuyo sa mga lugar nga gideklarang calamity areas mahimong maka-avail og lima ka adlaw nga special emergency leave. Mahimong tingbon og avail ang lima ka adlaw ug mahimo usab kining tigi-tigihon sulod sa 30 ka adlaw gikan sa deklarasyon sa state of calamity sa ilang lugar..   Nakabutang usab sa resolusyon nga dili mahimong kuhaon sa leave credits sa empleyado ang maong 5-day special calamity leave.   Apil sa natural calamity o disaster nga nasulod sa calamity leave ang linog, pagbaha, pagboto sa bulkan ug landslide nga makaingon sa grabeng epekto sa kinabuhi sa katawhan, kalikopan ug kapanginabuhian. (PIA-Bohol/ecb) _____________________________ Gidaghanon sa mga Pinoy nga walay trabaho, misaka TAGBILARAN CITY, Bohol, Feb. 23 (PIA)--Misaka ang gidaghanon sa mga walay trabahong Pinoy karong tuiga base sa bag-ong survey sa Social Weather Stations (SWS).   Matud pa sa survey, 24% ang gisaka sa unemployment rate niadtong Disyembre, 2011 diin 9.7 milyong Pilipino ang walay  trabaho sa maong buwan. Mas taas kini kun itandi sa 20.2% nga natala usab sa SWS, tulo ka buwan sa wala pa gipahigayon ang survey niadtong Disyembre 3-7.   Sa 9.7 milyong walay trabaho, 10% niini ang mga natangtang sa trabaho, 9% ang ni resign ug  5% ang mga first-time jobseekers.   Migawas sa survey nga ang nagka-grabeng kahimtang sa ekonomiya ang hinungdan sa unemployment rate sa nasud.    Mas daghan usab nga kababayen-an ang walay trabaho nga nikabat sa 35.6% sa labor force, mas taas sa nahiunang 25.6%.   Apil sa mga gi-survey sa SWS ang naa sa 18-anyos pataas ang edad nga nangita og trabaho, ang uban wala pa gihapoy trabaho ug wala gi-apil ang mga housewife, estudyante ug mga niretiro na.   Giangkon sa Malakanyang nga kinahanglan pang palig-onon ang ekonomiya sa nasud aron mas daghang trabaho ang mag-abli alang sa daghang Pinoy nga walay trabaho. (PIA-Bohol/ecb)