South Korea, bukas na sa pagpangdawat og OFWs   TAGBILARAN CITY, Bohol, Mar. 26 (PIA)--Bukas na ang gobyerno sa South Korea sa mga overseas Filipino workers (OFW) nga gustong motrabaho didto. Mao kini ang gibutyag ni Presidential adviser on overseas Filipino workers' Concerns ug Vice President Jejomar Binay, nga kasamtangan'g tua sa Seoul karon alang sa ikaduhang Nuclear Security Summit.  Matud pa ni Binay, mahimong dali na lang sa mga Pinoy workers ang motrabaho didto human gilagdaan sa Pilipinas ug South Korea ang usa ka memorandum of agreement kalabot sa employment, partikular na sa mga trabahante sa hotel and restaurant management industry. Gipaabot usab sa gobyerno sa Pilipinas nga mas dali na ang pag-proseso sa mga papeles sa mga returning OFWs sa South Korea tungod sa pagbisita ni Binay sa nasud.  Motambong sa maong summit ang kapin sa 50 ka lider sa mga estado ug gobyerno, apil na si US President Barack Obama. Samtang tua didto, makig-pulong usab si Binay sa mga taas nga opisyal sa Korea kalabot sa ika-63 anibersaryo sa pagkatukod sa diplomatic relations tali sa Pilipinas ug South Korea. (PIA-Bohol/ecb) _______________________   PH, apil sa listahan sa major drug laundering sa US   TAGBILARAN CITY, Bohol, Mar. 26 (PIA)--Naapil ang Pilipinas sa listahan sa 66 ka "jurisdiction of primary concern" o drug money-laundering countries sa tibuok kalibotan, matud pa sa US State Department. Gitawag ang usa ka nasud nga drug money-laundering country kun adunay pipila ka  financial institution ang misalmot sa transaksyon nga adunay kalabot sa pinalitay og ilegal nga droga sa uban pang nasud. Matud pa sa 2012 International Narcotics Strategy Report, padayon nga nakasinati ang Pilipinas og nagkadaghang foreign organized criminal activity gikan China, Hong Kong ug Taiwan. Giingong gipondohan sa mga insurgency group sa nasud ang mga ilegal nga buhat pinaagi sa mga local crime, kidnapping for ransom ug trafficking in narcotics and arms ug mosulod sa  money laundering sa pakig-alayon sa mga organized crime. Gawas sa Pilipinas, apil usab sa mga nasud sa Asya nga naa sa listahan sa mga drug money laundering nations ang Thailand, Indonesia, Cambodia, Singapore ug Burma. Giingon usab sa report nga ang salaping naggikan sa korupsyon mao usab ang tinubdan sa dirty money sa nasud. (PIA-Bohol/ecb)