Turismo sa nasud nitala og record high nga 17.5% tourist arrival sa buwan sa Enero   TAGBILARAN CITY, Bohol, Mar. 23 (PIA)--Nitala og record high nga 17.5% ang turismo sa nasud sa unang buwan ning tuiga.   Sa talaan sa Deparment of Tourism (DOT), mikabat na sa 400,000 ka turista ang mibisita sa Pilipinas niadtong Enero 2012, mas taas sa 350,000 nga rekord nga natala niadtong Enero 2011.   Sa mga banyagang turista, pinakadaghan ang mga miabot nga Koreano nga adunay 102,166 arrival. Gisundan kini sa mga Amerikano nga adunay 63,160 arrival; Chinese nga adunay 42,868 arrival; Japanese nga adunay 32,089 arrival; ug Taiwanese nga adunay 21,995 arrival.    Mikabat usab sa kapin 15,531 tourist arrival ang mga Pinoy nga nagpuyo na sa laing nasud  o ang mga balikbayan.   Tungod niini, positibo ang gobyerno nga maabot nila ang target nga 4.6 milyong turista sa dili pa matapos ang tuig.   Nagtuo ang DOT nga daku ang natabang sa tourism slogan nga "It's More Fun in the Philippines."   Giangkon sa DOT nga daku pa gihapon ang kumpetisyon sa mga silingan'g nasud mao nga target nila nga dugangan ang mga flights ug i-upgrade ang mga imprastraktura aron maapsan sa Pilipinas ang ubang kakumpitensyang nasud. (PIA-Bohol/ecb) ______________________   Pilipinas, mangayo og tabang sa US kalabot sa satellite launch sa NoKor TAGBILARAN CITY, Bohol, Mar. 23 (PIA)--Gitakdang mangayo og tabang ang Pilipinas sa Estados Unidos kalabot sa pagmonitor sa pagpalupad sa North Korea og satellite sa umaabot Abril 12 hangtud 16 ning tuiga.   Sa usa ka radio interview, gibutyag ni Department of National Defense (DND) Secretary Voltaire Gazmin nga kinahanglang mahibaw-an sa nasud kun unsa ang mga lalawigan nga posibleng mahagbungan og debris sa rocket nga paluparon sa North Korea sa paglusad sa satellite niini.   Matud pa ni Gazmin, pinaagi sa pagduol sa Estados Unidos, giingong mahatagan sa mga awtoridad ang katawhan sa mga lugar nga posibleng mahagbungan og debris sa rocket nga gamiton sa North Korea.   Giangkon sa kalihim nga walay kapabilidad ang nasud nga i-monitor ang aktibidad sa North Korea mao nga moduol na kini sa Estados Unidos.   Gikonsiderar sa Estados Unidos, Japan ug South Korea ang planong rocket launch sa Nokor nga apil sa malungtaron nga missile test nga giingong usa ka pagsupak sa nakalatid sa United Nations Security Council (UNSC) resolution. (PIA-Bohol/ecb)