Malacañang, mipahinumdom sa mga gov't agencies sa padayong pagpatuman sa AO 126 o Energy Conservation Program TAGBILARAN CITY, Bohol, Mar. 22 (PIA)--Mipahinumdom ang Malakanyang sa mga ahensya sa gobyerno kalabot sa gipatuman nga kamanduan sa pagdaginot sa paggamit og kuryente ug gasolina. Matud pa ni Deputy Presidential Spokesperson Abigail Valte, gipatuman pa gihapon ang  Administrative Order No.126 o Energy Conservation Program mao nga dili angay kalimtan sa mga ahensiya sa gobyerno ang pagdaginot sa enerhiya.   Sigon pa kang Valte, nakamonitor ang Presidential Management Staff (PMS) sa mga ahensya sa gobyerno aron mahibaw-an kun kinsa niini ang dagku og kunsumo sa kuryente ug gasolina.   Gipahinumdom sa Palasyo nga apil sa kamanduan ang pagpamalong sa paggamit sa mga air conditioner units ug mga suga sa mga government agencies matag breaktime.   Gi-aghat usab sa Palasyo ang publiko nga kuhaan og hulagway o video ug isumbong sa Office of the Ombudsman ang dili awtorisadong paggamit sa mga red plate nga sakyanan. (PIA-Bohol/ecb) _______________________   Daan nga SALN form lang gihapon ang ipagamit sa CSC   TAGBILARAN CITY, Bohol, Mar. 22 (PIA)--Nipagawas sa miaging semana og usa ka  resolusyon ang Civil Service Commission (CSC) nga naghikling una sa paggamit sa bag-ong Statement of Assets, Liabilities and Net Worth (SALN) sa mga empleyado ug opisyales sa gobyerno alang sa tuig 2011.    Kini tungod sa daghang reklamo gikan sa nagkalain-laing grupo sa gobyerno sa gipagawas nga kamanduan sa CSC sa paggamit sa bag-ong SALN form.    Gibutyag ni Dir. Ariel Ronquillo sa CSC-Office for Legal Affairs nga mahimo unang gamiton sa mga government employees ang daan nga SALN form samtang nagpahigayon pa sila og dugang pagtuon sa ipatuman nga kabag-ohan.   Ubos sa bag-ong SALN, ang tanang opisyales ug empleyado sa gobyerno obligadong ideklarar ang tanang gikuhaan sa ilang kinatibuk-ang kita, mga gastos nga personal ug pampamilya ug kinatibuk-ang gibayran nga income tax.   Apil sa mga personal nga gastos ang mga bayronon sa mobile phones, mga byahe, sapot, toiletries, pagkaon, mga alahas ug uban pa. Ang pampamilyang gastos usab naglakip sa  tuition fees, mga bayronon sa kuryente, tubig, cable, telepono, pagkaon sa pamilya, mga utang, mortgages ug uban pa.   Gipasabot sa CSC nga dili na kinahanglang i-itemized pa ang mga gastos tungod kay bisan  general statement alang sa tawo nga angay ideklarar, puwede na. (PIA-Bohol/ecb)