Walay ceasefire batok sa NPA   TAGBILARAN CITY, Bohol, Mar. 27 (PIA)--Gipahayag kagahapon sa Malacañang nga walay ceasefire nga ipatuman ang gobyerno batok sa rebeldeng New People's Army (NPA) sa Semana Santa.   Matud pa ni Presidential Spokesman Edwin Lacierda, walay ipatuman nga ceasefire ang gobyernong Aquino sa NPA sa panahon sa Semana Santa (Holy Week).   Gikompirmar usab kini ni Presidential Adviser on the Peace Process Teresita Deles apan bisan pa niini, nanghinaot siya nga ikonsiderar sa tanang bahan nga balaan ang umaabot nga Semana Santa.    Nagpasabot lamang kini nga padayon ang bakbakan tali sa mga sundalo ug NPA sa panahon sa Semana Santa tungod sa walay ipatuman nga ceasefire sa gobyerno. (PIA-Bohol/ecb) _______________________ General alert, ipasaka sa DILG dungan sa pag-obserbar sa Semana Santa TAGBILARAN CITY, Bohol, Mar. 27 (PIA)--Sugod sa Abril 2, ipasaka na sa Department of the Interior and Local Government (DILG) ang general alert status sa nasud aron maseguro nga mabantayan gayud ang publiko sa pag-obserbar sa Semana Santa.   Partikular nga gitahasan ni DILG Secretary Jesse Robredo ang Philippine National Police (PNP) nga bantayan ang peace and order apil na ang mga pagaduawon nga suroyanan apil na ang mga public beach resorts.   Gipabantayan usab sa DILG sa PNP- Highway Patrol Group (HPG) ang mga jeepney ug bus terminals sa mga probinsya.   Sa parte usab sa Bureau of Jail Management and Penology (BJMP), gipa-alerto ni Robredo ang mga jail warden sa kahadlok nga pahimoslan unya sa mga preso ang pag-ikyas karong Semana Santa.   Gipalihok usab niini ang mga local government units (LGUs) aron i-alerto ang mga barangay tanod aron magbantay sa mga lugar nga dugokon sa mga tawo.   Magpabilin ang general alert status sa tibuok nasud hangtud mahuman ang pag-obserbar sa Semana Santa sa Abril 9. (PIA-Bohol/ecb)  ________________________   Emergency Power alang ni PNoy giduso   TAGBILARAN CITY, Bohol, Mar. 27 (PIA)--Andam ang Kongreso nga hatagan og emergency powers si Presidente Benigno "Noynoy" Aquino III aron masulbad ang power crisis sa Mindanao tungod sa pagsaka sa presyo sa kuryente nga giingong dili na kaya sa mga power distributors mao nga naapektuhan ang mga consumers ug mga negosyante.   Gipahayag ni Eastern Samar Rep. Ben Evardone nga andam silang e-endorse ang emergency power tungod kay misalig sila kang PNoy ug nagtuo nga overpricing ang hinungdan sa krisis sa kur­yente sa Mindanao human nahimong pribado ang Power Barges 117 ug 118.   Giingong mas misaka ang singil sa kuryente sa dihang nahimong pribado na usab ang National Grid Corporation of the Philippines (NGCP) nga maoy gi-agian sa kuryente paingon sa mga panimalay sa mga consumers. Tungod niini, giingong kinahanglan ang direktang panginlabot ni Aquino sa maong problema tungod kay mameligro ang ekonomiya sa Mindanao kun magpadayon ang power crisis didto. Kalabot niini, miingon usab si Bayan Muna party-list Rep. Teddy Casiño, chairman sa House Committee on small business and entrepreneurship development, nga daghang gagmay o middle, small and micro enterprises (MSMEs) ang mas naapektuhan ug nipasidaan nga  magsarado tungod sa padayon nga nasinating krisis sa enerhiya sa Mindanao region. (PIA-Bohol/ecb) _________________________   'Contingency plan' sa mga OFWs sa SoKor gi-andam na TAGBILARAN CITY, Bohol, Mar. 27 (PIA)--Andam na ang 'contingency plan' sa Embahada sa Pilipinas sa Seoul aron masiguro ang kaluwasan sa may 50,000 ka Pinoy sa South Korea kun mas mo grabe pa ang tensyon sa Korean peninsula tungod sa plano sa North Korea nga molusad og rocket o satellite gamit ang gikahadlokan nga "ballistic missile technology".   Mao kini ang gipasalig sa Embahada kang Vice President Jejomar Binay, nga mao usab ang Presidential Adviser on Overseas Filipino Workers (OFWs) Concerns, human sa pagbisita niini sa Seoul.   Matud pa ni Binay nga dili makatarungan ang plano sa North Korea nga  rocket-launch sa  Abril 12 hangtud 16 ug tungod niini, gihatagan na og direktiba ang mga lokal nga kagamhanan nga posibleng maapektuhan sa pagpangandam.   Kahinumdoman nga nipagawas na og statement ang Department of Foreign Affairs (DFA) nga nakighiusa ang Pilipinas sa mga nasud nga mi-kondenar sa planong rocket launch sa North Korea.   Nanawagan ang Bise Presidente sa North Korean government nga sundon ang nakalatid  sa  UN Security Council Resolutions 1874 ug 1718 nga nagmando nga ibasura sa North Korea ang ilang ballistic missile program. (PIA-Bohol/ecb)