Mga Pinoy, gi-awhag sa pagsalmot sa Earth Hour   TAGBILARAN CITY, Bohol, Mar. 28 (PIA)--All-set na ang Pilipinas sa pagsalmot kauban ang daghang nasud sa tibuok kalibotan sa ipahigayon nga pagpamalong og suga sulod sa usa ka oras isip pagsalmot sa Earth Hour. Ang 2012 Earth Hour ipahigayon sulod sa usa ka oras gikan alas-8:30 hangtud alas-9:30 sa gabii karong Sabado, Marso 31. Naglaum ang Department of Environment and Natural Resources (DENR) ug ang Department of Energy (DOE) nga ang pagsalmot sa tinuig nga Earth Hour dili lamang kasamtangan apan padayon nga pagsalmot sa mga programa batok sa climate change. Matud pa ni DENR Secretary Ramon Paje nga ang pagsuporta sa mga tree planting activities ug pagdaginot sa kuryente mga paagi usab sa pagbatok sa climate change. Sukad tuig 2008 sa dihang unang misalmot ang Pilipinas, kanunay na lamang kining  nanguna sa mga nasud pinaagi sa daghang mga lalawigan ug syudad nga misalmot. Base sa impormasyon, niadtong tuig 2009 nakadaginot sa eletrisidad ang Pilipinas nga mikabat sa 611 megawatts sa pagpalong og suga sulod sa usa ka oras. Karong tuig 2012, ang tema sa Earth Hour nga "I Will If You Will" adunay hagit sa mga indibidwal ug mga organisasyon nga mosalmot sa pag-alima sa kalikopan nga adunay  commitment. Ang Earth Hour nagsugod sa usa ka syudad lamang niadtong tuig 2007 ug niadtong tuig 2011, mikabat na sa kapin 1.8 bilyon ka tawo gikan sa 135 ka mga nasud sa nagkalain-laing  kontinente ang misalmot aron makuha ang "the World's largest campaign for the planet." Sa himuong switch-off ceremonies, mahimong sentro ang syudad sa Makati, Cebu ug Davao, apan daghan pang mga lugar ang mopahigayon usab sa nagkalain-laing aktibidad. Samtang nangandam na usab ang daghang nasud ug world leaders sa ipahigayon nga  Earth Hour. (PIA-Bohol/ecb) __________________________   AFP di magdeklarar og red alert sa NPA aniv.   TAGBILARAN CITY, Bohol, Mar. 28 (PIA)--Dili magdeklarar og red alert ang Armed Forces of the Philippines (AFP) batok sa rebeldeng New People's Army (NPA) kalabot sa ika-43 ka tuig nga anibersaryo sa komunistang grupo ugma, Marso 29. Matud pa ni AFP Chief of Staff Lt. Gen. Jessie Dellosa nga matag saulog sa NPA sa ilang anibersaryo kada tuig, istilo na nila nga molusad og kasamok sama sa ambushcades ug pagsulong batok sa tropa sa militar. Gihatagan og direktiba ni Dellosa ang mga sundalo nga magpabiling magbinantayon ug hingusgan pa ang intelligence monitoring. Gi-aghat usab ni Dellosa ang publiko nga magbinantayon sa ilang palibot. Sa talaan sa AFP, sa wala pa ug human ang anibersaryo sa NPA sa miaging tuig, nalambigit ang maong grupo sa 29 ka insidente sa kaguliyang nga meresulta sa pagkamatay sa siyam ka sundalo, lima ka polis, usa ka CAFGU samtang 12 ka NPA ug pito ka sibilyan ang namatay. (PIA-Bohol/ecb) ___________________________   Mag-amping sa mga modus karong Semana Santa - PNP   TAGBILARAN CITY, Bohol, Mar. 28 (PIA)--Gitambagan sa Philippine National Police (PNP) ang mga motorista batok sa nagkalain-laing modus sa mga kriminal karong Semana Santa. Kini tungod sa gipaabot nga pagsaka sa gidaghanon sa mga mo byahe sa nagkalain-laing  lalawigan tungod sa taas nga bakasyon. Gipahinumdoman sa PNP ang publiko nga likayan ang pagsul-ob og mga mahalong alahas ug makisayod sa labing duol nga PNP assistance booth kun moadto sa mga lugar nga dugokon sa mga tawo sama sa simbahan.  Dugang pa sa PNP, angay siguradohon sa publiko nga kanunay silang dunay dala nga identification card (ID) o bisan unsang makaila sa mga kauban nilang mga bata. Gawas sa mga modus operandi, giingong angay usab nga mag-amping ang mga motorista sa posibleng aksidente sa kadalanan. (PIA-Bohol/ecb)