PNoy, nimando sa pagbungkag sa mga private armies sa tibuok nasud   TAGBILARAN CITY, Bohol, Mar. 29 (PIA)--Gimando ni Presidente Benigno Aquino III ang pagbungkag sa pagdagsang sa mga private armies sa tibuok nasud. Gibalik sa Presidente kining maong direktiba human ang pakigpulong niini kagahapon sa pila ka miyembro sa iyang gabinete kalabot sa ipahigayong voters registration sa Autonomous Region in Muslim Mindanao (ARMM). Matud pa sa Presidente, aduna na siya'y direktiba sa Phi­lippine National Police (PNP) alang  sa hingpit nga pagbungkag sa mga private armed groups (PAGs) dili lamang sa ARMM apan  sa tibuok nasud. "I've tasked the PNP specifically for the continuing efforts to remove all of these private armed groups that everyday exist, not only the ARMM. We're going around the entire country," matud pa sa Presidente. Giangkon sa Presidente nga taas ang lista­han sa mga giingong private armies nga kasamtangan pang gipa-ubos karon sa revalidation sa mga awtoridad. Kini bisan pa sa pagkabungkag na sa pipila ka PAGs sama sa Kalinga Group. (PIA-Bohol/ecb) _______________________   Singil sa kuryente sa tibuok nasud mosaka karong Mayo – ERC   TAGBILARAN CITY, Bohol, Mar. 29 (PIA)--Kumpirmado na ang pagsaka sa singil sa kuryente sa tibuok nasud human gi-aprubahan sa Energy Regulatory Commission (ERC) ang hangyo nga rate adjustment o dugang-singil sa National Power Corporation (Napocor) ug Power Sector Assets and Liabilities Management Corp. (PSALM). Mokabat sa 69.04 sentimo matag kilowatt-hour (kWh) ang mahimong dugang-singil sa Napocor ug PSALM sa Luzon, 60.60 sentimo sa Visayas ug 4.42 sentimo/kWh usab sa Mindanao. Matud pa ni ERC Executive Director Francis Saturnino Juan, naaprubahan ang dugang-singil base na usab sa Generation Rate Adjustment Mechanism (GRAM) ug Incremental Currency Exchange Rate Adjustment (ICERA) Mechanism nga gikan usab sa fuel and purchased power costs ug foreign exchange costs gikan Enero 2007 hangtud Abril 2010. Epektibo ang bag-ong GRAM ug ICERA rate adjustment sugod sa billing sa duha ka ahensya karong Marso 26 hangtud Abril 25. Taliwala usab sa nasinating krisis sa Mindanao, mosaka pa ang singil sa kuryente didto gawas pa sa gi-aprubahang dugang-singil sa ERC.  Sa usa ka radio interview, gipasabot ni Energy Secretary Jose Rene Almendras nga kun mogamit na og laing source sa kuryente didto sama sa diesel, mahimong mosaka hangtud P0.80/kWh ang generation cost. Matud pa ni Almendras nga sa pagkakaron, ubos pa ang gibayarang generation cost sa Mindanao tungod kay hydroelectric power plant pa ang gigamit.  Apan kun matukod na ang mga bag-ong planta, mo-ubos na pagbalik ang generation cost tungod kay dili na kini pareho kamahal sa diesel. (PIA-Bohol/ecb)