Red alert sa tibuok nasud sa Semana Santa   TAGBILARAN CITY, Bohol, April 02 (PIA)--Dungan sa pagsugod sa Semana Santa, gisaka na sa red alert status sa National Disaster Risk Reduction and Management Council (NDRRMC) ang tibuok nasud. Matud pa ni NDRRMC Executive Director Benito Ramos, kini aron matubag dayon ang panginahanglan sa mga pasahero kalabot sa emergency situation nga modagsa sa mga terminal, expressways, tourist destinations ug mga simbahan. Gawas sa Semana Santa, hingpit usab nga gi-monitor sa NDRRMC ang weather situation tungod sa padayon nga pag-ulan nga nasinati sa nagkalain-laing lugar sa nasud. Nagpagawas usab og flood advisory ang NDRRMC sa mga lugar sa Region 2, Region 3, Region 4 A, Region 4 B, Region 5, Region 6, Region 8 ug Region 11. Matud pa kang Ramos, andam na ang tanan nilang kawani sa tibuok nasud sama sa PNP, AFP, PCG, DTI, DepEd, ug uban pang ahensya sa kagamhanan aron motabang sa mga  lugar nga dugokan sa mga tawo. Giingong maayo nga mahimong andam na daan ang ilang buhatan sa bisan unsang mahimong mahitabo aron padayon nang mawala ang kahadlok sa mga tawo, ilabi na ang mga bakasyunis­ta kalabot sa ilang seguridad ug peace and order situation karong Kuwaresma. (PIA-Bohol/ecb) ________________________________   PCG nipasidaan batok sa mga colorum nga barko   TAGBILARAN CITY, Bohol, April 02 (PIA)--Nipasidaan ang pamunuan sa Philippine Coast Guard (PCG) sa mga pasahero sa mga sakyanang pangdagat batok sa mga colorum nga barko karong Semana Santa. Matud pa ni PCG Spokesman Lieutenant Commander Algier Ricafrente, kasagarang pahimoslan sa mga tag-iya sa dili rehistradong barko ang panahon sa bakasyon tungod sa daghang mo-biyahe. Giingong kasagaran magpa-abang ang mga tag-iya og gagmay nga bangka padung sa nagkalain-laing isla. Ang uban pa niini mo-pwesto sa mga port terminal aron makakuha og mga stranded nga pasahero. Gipasabot ni Ricafrente nga delikado ang mga colorum nga barko tungod kay walay makuha nga bisan unsang ayuda ang mga pasahero niini kun adunay mahitabong aksidente. (PIA-Bohol/ecb)