Sabado de Gloria, gi-deklarar nga holiday   TAGBILARAN CITY, Bohol, April 03 (PIA)--Gi-deklarar sa Malacañang nga special non-working holiday ang Sabado de Gloria (Abril 7). Kini base sa Proclamation No. 360 nga gilagdaan ni Presidente Benigno S. Aquino III niadtong Marso 29. Ang Sabado de Gloria kun Black Saturday natunong taliwala sa Good Friday ug Easter Sunday nga tradisyon nang gi-deklarar isip special non-working holiday sa tibuok nasud. Kini aron mahatagan og igong panahon ang katawhan sa paghandom sa Semana Santa nga usa sa mga tradisyong gihatagan og bili sa mga Katoliko. (PIA-Bohol/ecb) ______________________   'Oplan Red Plate' hingusgan karong Semana Santa TAGBILARAN CITY, Bohol, April 03 (PIA)--Gipahinumdoman ni Deputy Ombudsman for Visayas Pelagio Apostol ang tanang mga opisyal sa kagamhanan ug mga kawani sa gobyerno sa dili paggamit sa mga sakyanan sa gobyerno sa pagbakasyon sa ilang mga pamilya atol sa Semana Santa hangtud karong Abril 9 nga gi-deklarar usab nga holiday. Ang mapamatud-an nga migamit sa mga sakyanan sa gobyerno alang sa personal nga tumong ug walay mga trip tickets manubag gayud ubos sa Republic Act No. 3019 (Anti-Graft and Corrupt Practices Act), Republic Act No. 6713 (Code of Conduct and Ethical Standards for Public Officials and Employees), Revised Administrative Code of the Philippines, Commission on Audit (COA) circulars, Government Accounting and Auditing Manual ug  uban pang mga balaod. Gi-awhag sa Ombudsman ang katawhan sa pagpakabana ug mahimong timan-an ang plaka, kolor ug matang sa sakyanan, ang takna ug ang lugar diin nakit-ang gigamit ang sakyanan sa gobyerno alang  sa personal nga biyahe. Ang Ombudsman-Regional Office nanawagan sa nagpakabanang katawhan nga e-text sa ilang interagency task-force (09178898662) ug sa Ombudsman (09155391957) ang mga sakyanang makit-ang gigamit sa personal nga biyahe. Ang Ombudsman-Visayas nimugna og interagency task force nga "Oplan Red Plate" kauban ang Land Transportation Office (LTO), Civil Service Commission (CSC), Philippine National Police (PNP) ug sa Philippine Information Agency (PIA). (PIA-Bohol/ecb)