Bohol Tourism Complex gitanyag 

Ni Gob nga city tour destination 

Rey Anthony Chiu 

TAGBILARAN CITY, Bohol April 25, 2013 (PIA) – Gitanyag ni Gobernador Edgar Chatto ang Bohol Tourism Complex isip usa sa mga labing importanteng suroyanan sa mga turista dinhi sa syudad sa Tagbilaran. 

Sa iyang informal nga pagpakigpulong pipila ka minutos sa wala pa ang Induction of Officers sa Kahugpungan sa mga Bol-anong Tour Guides (KaBoG) Inc., gisaysay ni Chatto ang iyang pag-aghat nga malakip na sa city tour ang palibot sa kanhi Governor’s Mansion. 

Ang Govenor’s Mansion natukod niadtong tunga-tunga sa 1920 isip dormitoryo sa mga kababayen-an nga nagtungha sa Bohol Provincial High School, nahimo ang karaang gambalay nga halos opisyal na nga puy-anan sa natudlong Gobernador, kanhi Presidente Carlos P. Garcia sa iyang paglingkod sa gahum niadtong 1933. 

Sa pagboto sa giyera, ang pasilidad gihimong puy-anan sa mga opisyal sa Japanese Imperial Army, hangtud nga panagsaan lamang kini og tanda sa mga misunod nga mga gobernador kinsa may mga balay usab dinhi o ang pinuy-anan nga uli-an duol lamang sa syudad. 

Sa paglingkod ni kanhi Gobernador ug uyo-an ni Chatto nga si Lino isip gobernador, gipaayo ang lugar lakip na ang lapad nga natad niini niadtong 1967. 

Sa panglantaw nga himoon ang puy-anan nga Gamay nga Malakanyang sa Bohol, giusab ang dagway ug sa dormitory nagdto na sa Governor’s Mansion nga may kompletong mga fountains nga gisug-an sa natad niini. 

Karon sa pamuno-an ni Chatto ug samtang ang Bohol nangandoy sa malungtarong eco-cultural tourism destination, gipamaayo pa ang People’s Mansion nga kanhi nailhan nga Governors Mansion aron molama niin ang kulturanhong kapanulondan sa lalawigang Bol-anon. 

Dili pa lamang dugay, gilakip na sa nataran sa Mansion ang Bayanihan Coordinating Center, ang buhatan nga maoy nanguna sa pagpatukod og mas baratong mga tunghaan pinaagi sa tinabangay. 

Anaa na usab sa sulod sa Mansion ang naila na nga Tarsier 117 nga maoy nahimong kasingkasing sa serbisyo nga tabang alang sa mga Bol-anon pinaagi sa komunikasyon, emergency medical unit ug rescue and retrieval Teams aron pagluwas sa mga anaa sa kalisud. 

Gawas pa, naa gihapon sa likod sa Mansion ang model sa Bahay Kubo, nag-unang programa sa probinsya sa pag-asdang sa agricultura ug pagkaon. 

Sa laing bahin, naa usab sa mansion ang Bohol Tourism Office, ang local nga buhatan nga natahasan nga manguna sa kaugmarang pangturismo sa Bohol ug manguna sa promosyon ug marketing sa lalawigan. 

Ang Tarsier 1117, Bayanihan Coordinating Center, Bahay Kubo ug ang Tourism Office nga naglibot sa makasaysayong People’s Mansion karon ginganlan na og Bohol Tourism Complex ug may labing dali nga hubad sa slogan sa Bohol nga Health, Education, Agriculture ug Tourism, matud ni Chatto. (30/ed)

============

Bohol ‘nangandam’ na 

Alang sa Ocean Month 

Rey Anthony Chiu 

TAGBILARAN CITY, Bohol April 25, 2013 (PIA) – Kamolo na ang pagpangandam sa Bohol alang sa tinuig nga kasaulogan sa Buwan sa Kadagatan ug sa ika tulo nga Bohol Dolphin Festival. 

Atul sa labing bag-ong tigum nga gi-apilan sa mga sakop sa Bohol Coastal Resource Management Task Force (BCRMTF) ug sa Bohol Rescue Unit for Marine Mammal and Wildlife (BRUMMW) didto sa Conference Hall sa Bureau of Fisheries and Aquatic Resources (BFAR) nahukman nga ang mga kalihukan sa kasaulogan paga-apila sa bagang katawhang Bol-anon. 

Buksan ang kasaulogan sa Buwan sa Kadagatan (Ocean Month) pinaagi sa usa ka motorcade, segun sa nasabutan sa tigum nga gidumala ni Cresencio Pahamutang sa BFAR. 

Ang Motorcade nga pagasalmotan sa mga sakop sa task force ug sa mga buot moduyog sa kalihukang pa-ukyab himoon sa Mayo 2 ug molibot sa mga dagkong dalan sa syudad ug gikasabotang taposon pinaagi sa usa ka information education communication drive. 

Matud ni Pahamutang, gawas sa motorcade, adunay usay pagsab-ong sa mga streamers sa mga sakop nga ahensya sa Task Force didto sa mga nagkadaiyang lugar, paghimo og mga paglimpyo sa kabaybayonan, pagpananum og bakhaw ug ubang mga kalihukan nga may kalabuatn sa pagpatunhay sa kadagatan. 

Gawas niini, nahipno na usab ang mga kalihukan nga abag sa Ocean Month, pinaagi sa tigum nga gisalmotan sa mga sakop sa BRUMM ug BCRMTF. 

Usa ka memorandum na usab ang napagawas sa buhatan sa Gobernador aron paghulma sa mga working committees sa ika tulo nga tinuig nga kasaulogan sa Dolphin Festival. 

Matud ni Gob. Chatto, ang importansya sa dolphin o lumbag, may kalambigitan sa turismo ug kalikopan sa Bohol. 

Daghan nga mga komunidad ang nabuhi sa dolphin ug whale watching nga kalihukan ug nakapalapad sa mga negosyo sa mga may serbisyo alang sa mga turista. 

Tumong sa Dolphin Festival nga ipahigayon sa Hunyo 28, dungan sa Environment Month ang pagdugang sa kasayuran sa pagpatunhay sa ka-hinguhaan sa kadagatan, ang iyang importansya ug kaayohan sa katawhan. (30/hd)