PNoy, masaligon sa positibong epekto sa PH sa gitambongang ASEAN Summit 

TAGBILARAN CITY, Bohol, April 26 (PIA)--Sa pag-abot ni Presidente Benigno “Noynoy” Aquino III kagahapon gikan sa gitambongang ASEAN Summit sa Brunei, gibalita niini ang positibong epekto sa Pilipinas partikular na sa isyu sa gi-ilogang teritoryo sa West Philippine Sea. 

Sa pahayag sa Presidente kagahapon sa NAIA Terminal 2, miingon kini nga uyon ang mga pangulo sa mga nasud nga apil sa ASEAN sa panawagan sa Pilipinas kalabot sa hingpit nga implementasyon sa mga prinsipyong nahisulod sa Declaration on the Conduct of Parties in the South China Sea. 

Sa gipahigayon nga summit, gitumbok sa Pilipinas ang kamahinungdanon sa pagmugna og usa ka Code of Conduct sa gi-ilogang mga teritoryo nga matud pa sa Presidente nga ilhon, tahuron ug sundon sa matag miyembro. 

"Batid ng lahat ng pinuno ng ASEAN: ang maigting nating paninindigan ukol sa West Philippine Sea, ay nakatuon, hindi lamang sa pansariling interes ng kanya-kanyang bansa, kundi para rin sa mas aktibong kalakalan, at malawakang kaunlaran sa bahaging ito ng daigdig," matud pa sa Presidente. 

Sa pahayag sa ASEAN human sa gihimong summit, miingon kining padayon kining makig-alayon sa China alang sa malinawon nga resolusyon sa territorial dispute. 

Upat ka nasud nga miyembro sa ASEAN ang nakig-ilog sa China sa ilang teritoryo apan ang Pilipinas pa lamang ang midulog sa international court, butang nga suportado sa Vietnam. 

Gawas sa hisgotan sa ilogay sa teritoryo, gituki usab ang komersiyo ug turismo tali sa mga nasud nga apil sa ASEAN. 

Gihisgotan usab ang tensyon sa Korean Peninsula diin gi-aghat sa ASEAN ang North Korea nga mosunod sa mga obligasyon niini ubos sa United Nations Security Council (UNSC). (PIA-Bohol/ecb/i-ed) 

=============

Comelec, miseguro nga dili makalusot ang signal jamming sa eleksyon 

TAGBILARAN CITY, Bohol, April 26 (PIA)--Giseguro sa Commission on Elections (Comelec) nga dili makamugna og failure of elections ang mga signal jamming devices sa umaabot nga piniliay sa nasud sa Mayo 13. 

Sa gipahigayong press conference sa Camp Crame kagahapon sa Comission on Elections (Comelec), Philippine National Police (PNP), Armed Forces of the Philippines (AFP), Department of Interior and Local Government (DILG) ug National Telecommunication Commission (NTC), miingon si Comelec Chair Sixto Brillantes nga ang signal jamming devices maka-delay lamang sa transmission sa resulta sa botohan sa matag polling precinct. 

Matud pa sa poll body chief, hangtud duha ka adlaw nga delay sa pagpagawas sa resulta ang mahimo sa jamming device kun gamiton kini. 

Nihangyo sa publiko ang Comelec, PNP, AFP, DILG ug NTC nga tabangan silang mapugngan ang posibleng pagsabotahe sa transmission sa resulta sa eleksyon ug ipahibalo dayon kun may mamatikdan o makitang mga signal jamming devices aron dali kining maaksyunan. 

Base sa memorandum order sa NTC, ang pagpalit, pagbaligya ug importasyon sa GSM jamming device may silot nga 2 hangtud 6 ka tuig nga pagkabilanggo nga walay parole. Mag-atubang usab sa paglapas sa election laws kun gamiton kini sa pagsabotahe sa eleksyon nga may silot nga 8 hangtud 12 ka tuig nga pagkabilanggo. (PIA-Bohol/ecb/i-sjp) 

============

Paglagda og kasabotan alang sa malinawon nga piniliay, gitakda sa Mayo 5 

TAGBILARAN CITY, Bohol, April 26 (PIA)--Gitakda sa Mayo 5 sa St. Joseph Cathedral ang paglagda og kasabotan sa mga kandidato sa lalawigan sa Bohol alang sa malinawon nga piniliay sa umaabot Mayo 13. 

Kini pagatambongan sa tanang mga kandidato sa provincial level gikan sa gobernador, bise gobernador, kongresista ug mga sakop sa sangguniang panlalawigan aron sa pag-apil sa santos nga misa. 

Ang maong santos nga misa nga gitakdang ipahigayon sa alas 5 sa hapon pangunahan ni Obispo Leonardo Medroso sa Diocese sa Tagbilaran ug didto himuon sa tanan nga mikandidato sa provincial level ang paglagda sa kasabotan. 

Gibutyag ni PSupt. Jeffrey Caballes sa Kampo Dagohoy nga ang maong paglagdaay sa kasabotan nga pagahimuon alang sa gipangandoy nga malinawon nga piniliay sa Mayo 13. 

Pagasaksihan kini sa mga kadagkuan sa Commission on Elections (Comelec), Philippine National Police (PNP) ug Armed Forces of the Philippines (AFP) dinhi sa Bohol. (PIA-Bohol/ecb/i-gg)