Japan, nihimakak nga gitangtang na nila ang visa requirement sa mga Pinoy

TAGBILARAN CITY, Bohol, June 27 (PIA)--Gihimakak karon sa Japanese government ang nikatap nga balita sa Internet nga gitangtang na nila ang visa requirement alang sa mga Pilipino nga mobisita sa Japan.

Gi-klaro sa gobyerno sa Japan nga ang mga Thai ug Malaysians lamang ang gihatagan nila og visa exemptions.

Una nang nipagawas og pahayag ang Ministry of Foreign Affairs (MOFA) sa Japan sa website niini niadtong Hunyo 25 nga gitugtan ang pag-isyu og multiple entry visas sa mga Filipino citizen nga valid og tulo ka tuig.

"In celebration of the 40th Year of ASEAN-Japan Friendship and Cooperation, the Government of Japan has decided to begin issuance from July 1, of multiple entry visas for short-term stay to nationals of the Republic of the Philippines (ordinary passport holders) who reside in their home country," matud pa sa pahayag sa MOFA website niini.

Samtang mahimong magpabilin hangtud 15 ka adlaw ang mga Pinoy nga may visa.

Kadtong interesadong mokuha og visa sa Japan kinahanglang mo-apply sa Japanese embassy pinaagi sa mga accredited nga ahensya niini tungod kay dili man direktang modawat og visa applications ang embahada sa nasud. (PIA-Bohol/ecb) 

==============

Palasyo, moduso og kaugalingong bersyon sa FOI bill

TAGBILARAN CITY, Bohol, June 27 (PIA)--Giingong dili sertipikahan isip urgent ni Presidente Benigno ‘Noynoy’ Aquino ang Freedom of Information (FOI) billl nga planong banhawon sa pipila ka magbabalaod sa pagbukas sa 16th Congress sa Hulyo. 

Matud pa ni Presidential Spokesperson Edwin Lacierda, moduso og kaugalingong bersyon ang Malakanyang sa Kongreso. 

Gitumbok ni Lacierda nga bisan walay FOI, ginahimo man sa gobyerno ang panawagan sa mga nagduso niini.

Giingong dugay nang transparent ang gobyerno sa mga gipangsulod niining kontrata o transaksyon sa paggamit sa pondo sa gobyerno. 

Niadtong Enero 25, sa dihang aduna lamang ubos sa siyam ka nahabiling adlaw sa session days sa Kongreso, gisalikway ni Presidente Aquino ang sugyot nga sertipikahan ang maong balaodnon samtang tua pa siya sa Switzerland alang sa usa ka official trip.

Gipasabot sa Presidente nga may mga provisions pa sa FOI bill nga kinahanglan unang hisgotan. (PIA-Bohol/ecb)