BJMP modawat sa order sa mga 

parol nga hinimo sa mga priso

TAGBILARAN CITY, Bohol, November 14, (PIA)—Nanawagan og suporta ang Bureau of Jail Management and Penology (BJMP) gikan sa katawhan aron makatabang sa pag-puno sa mga panginahanglan sa mga bilanggo. 

Matud ni Eric Gideon Bruce Zabala, ning panahon sa pasko, panahon usab nga makapakita ang mga binilanggo sa ilang abilidad, ilabi na sa paghimo og mga parol dayan-dayan alang sa pagbulig sa kasadya sa pasko. 

Kahinumduman nga gitudlo-an ang mga priso sa paghimo sa kuti nga mga parol, aron usab may kalingawan sila samtang nagpaabot sa ilang hukom. 

Usa pa, ang paghimo ug pagpamaligya sa mga priso sa ilang mugna nga mga parol maoy ilang dugang kakuhaan sa kita aron may ikapamalit sa mga panginahanglan samtang naa sa bilangguan. 

Si Zabala, kinsa maoy information officer sa Bohol District Jail (BDJ) mibutyag nga sa mga nanglabay nga panahon, maghimo lamang ang mga priso sa mga parol ug maghuwat kon may mopalit sa ilang hinimo. 

Niini nga pamaagi, usahay may mga parol nga dili mahalin, nga maoy hinungdan sa pagkasayang na hinuon sa paningkamot sa priso. 

Aron malikayan ang pagkasayang, makapalit na ang kadaghanan sa mga parol sa pamaagi nga pag-order aron himoon kini sa mga bilanggo. 

Sa laing bahin, mibutyag si Jose Rusylvi Abueva nga ang mga buhat sa mga priso bunga sa mga workshops nga ilang gitambongan aron pagpawala sa kalaay. 

Dugang niya, daghang mga priso ang may gihuptan nga mga abilidad sa arte, mga butang nga mahimong magamit sa ilang pagpaningkamot nga makabalik na sa hapsay nga katilingban. 

Libre man ang mga priso sa rasyon sa pagkaon, may mga panginahanglan sama sa sabon, mga kagamitan alang sa personal hygiene ug mga personal nga gamit ang dili ikahatag sa mga nagdumala sa bilangguan. 

Tungod niini, nangitag mga paagi ang mga tinugyanan nga mahatagan og solbad ang mga kakuwangon, hinungdan sa pagpamaligya sa mga ginimo nga mga butang sa mga priso. 

Alng sa mga orders, mahimong ipaagi sa BJMP sa BDJ o ipasubay sa facebook pinaagi ni Zabala o ABueva. (rac/PIA-7/Bohol)