Tubag sa hagit sa brown rice, 

hatag usa ka tasa sa gigutom

TAGBILARAN CITY, Bohol, November 14, (PIA)—Padayon pa ang #brown4good challenge sa paghatag og usa ka tasa nga bugas sa matag hulagway sa pagkaon sa pinawa nga humay dungan usab sa opisyal nga hashtag. 

Kini maoy gibutyag ni Cheryl dela Victoria, didto sa Kapihan sa PIA. 

Matud niya, ang #brown4good challenge gisugdan niadtong Agosto 28 ngadto sa Oktubre 21, kanus-a gi-inat usab ang kampanya sa Be Riceponsible dungan sa National Year of Rice sa 2013. 

Ang Philippine Rice Research Institute (PRRI) una na nga mipadayag nga ang kampanya sa humay nga pinawa, nagsukad sa upat ka mga rason nganong angay ikampanya ang brown rice. 

Matud sa nag-unang institusyon sa pagtuon sa humay sa nasud, ang brown rice 1) puno sa bitamina ug minerales kon itandi sa well-milled rice o ingog perlas nga lugas sa ginaling. 

Gawas pa, ang pagpili sa brown rice magdugang sa produksyon tungod kay masalbar pa niini ang 10% nga bugas kon ipagaling sa kausa lamang ka agi sa makina. 

Ikatulo, ang ka-usa nga paggaling sa brown rice dili lamang makapadaginot sa bayad sa galing, kon dili makadugang pa kini sa kita sa mga mag-uuma. 

Usab, sa brown rice, sa matag apil sa kampanya, mohatag ang Department of Agriculture (DA) sa us aka tasa ngadto sa mga kabus ug gigutom. 

Karong buwan sa Nobyembre, giisip nga National Rice Awareness, matud ni dela Victoria, ipadayon ang #brown4good challenge. 

Sa musalmot ug mosanong sa hagit, magkuha rag hulagway sa gikaon nga brown rice ug i-upload kini sa social media, dungan usab sa pagbutang sa hashtags” #brown4good, #Region7, #Challengeaccepted.

Sa matag hashtag nga makit-an, ang rehiyonal nga buhatan mag gahin og us aka tasa sa brown rice ug ihatag kini sa mga walay gikaon pinaagi sa paghatag niini sa us aka charitable institution nga napili sa DA. (rac/PIA-7/Bohol)