Hulga ni Duterte sa pagsuspinder sa writ of habeas 

corpus, usa lamang ka ideya matud pa sa Palasyo 

MANILA, November 14 (PIA)--Nihatag og katin-awan ang Malakanyang sa gihimong pagpang-hulga ni Presidente Rodrigo Duterte nga suspindehon ang writ of habeas corpus.

Kini kun magpadayon ang kagubot o lawlessness sa Mindanao.

Matud pa ni Presidential Communications Office (PCO) Kalihim Martin Andanar, ang posibilidad sa pagsuspinder sa writ of habeas corpus usa lamang ka ideya nga nigawas sa hunahuna sa Presidente.

Giingong ang nahimong pahayag ni Duterte sa pagsuspinder sa writ of habeas corpus adunay kalabotan sa problema sa ilegal nga droga sa nasod.

Dugang pa ni Andanar, nabalaka na si Presidente Duterte sa nagka-grabeng problema sa droga sa nasod mao nga pila ka higayon kining nangayo ug tabang sa publiko tungod kay dili niya kini masulbad nga nag-inusara lamang.

Apan taliwala niini, gitumbok ni Andanar nga wala kini nagpasabot nga napakyas ang gobyerno sa pagsugpo sa ilegal nga droga sa nasod sa unang unom ka buwan sa administrasyong Duterte. (ecb/PIA7-Bohol)